O INE confirma a inflación de marzo no 9,8 %, a máis alta desde 1985
O INE confirma a inflación de marzo no 9,8 %, a máis alta desde 1985
En Galicia o IPC dispárase ao 10,5 %, a maior taxa desde 1984
A suba foi provocada polo encarecemento da electricidade, os combustibles e os alimentos
O Instituto Nacional de Estatística confirmou que a inflación subiu no mes de marzo ao 9,8 % interanual, a taxa máis alta desde maio de 1985, provocada polo encarecemento da electricidade, os combustibles e os alimentos.
O IPC publicado este mércores polo INE mantívose igual respecto ao avance do 30 de marzo e sitúase 2,2 puntos por encima do dato de febreiro, que ascendeu ao 7,6 %.
Deses 2,2 puntos de diferenza a maior parte achegouna o grupo da vivenda (0,9 puntos), pola suba da electricidade, e o do transporte (0,7 puntos), pola alza dos carburantes.
Un dos sectores que tiran dos prezos para arriba é o do transporte, co incremento de novo dos custos do combustible. Unha alza que tamén se nota no mercado. Custa máis facer a compra diaria. Os alimentos e as bebidas non alcohólicas soben, especialmente as pastas, a fariña ou o arroz.
Algo menos encarece a hostalería, aínda que os prezos dos servizos de aloxamento aumentaron máis que en marzo de 2021. A inflación en España supera xa a media da zona euro, que está no 7,5 %, ou dos Estados Unidos, onde é do 8,5 %.
Os prezos en Galicia, sete puntos por enriba da media española
En canto a Galicia, o índice de prezos de consumo disparouse un 10,5 % en marzo, en comparación co mesmo mes do ano anterior, sete décimas máis que a media estatal, segundo os datos publicados este mércores polo INE.
Este dato supón a súa taxa máis alta na comunidade galega en case 38 anos, xa que non se rexistraba un valor tan elevado desde outubro de 1984, cando estaba nun 10,9 % interanual.