O xefe de Wagner ordena frear o avance das súas tropas cara a Moscova

Ievgueni Prigozhin, xefe de Wagner nega a información belarusa dun acordo pero admite a volta das tropas de Wagner debido á ameaza dun derramamento de sangue polo avance dos mercenarios cara a Moscova nas últimas horas.

O líder dos mercenarios de Wagner informou a través da súa canle de Telegram que "non aceptou ningunha proposta de Lukashenko. As negociacións existiron pero non foron satisfactorias". A súa mensaxe principal foi a seguinte:

"Ían desmantelar a PMC Wagner. Saímos o 23 de xuño na Marcha da Xustiza. Nun día, chegamos a estar a 200 quilómetros de Moscova. Neste tempo, non derramamos nin unha soa pinga de sangue dos nosos soldados. Agora, chegou o momento en que o sangue pode derramarse. É por iso que, ao entender a responsabilidade de derramar sangue ruso nun dos lados, fixemos retroceder os nosos convois e estamos volvendo aos campamentos seguindo co noso plan".

Lukashenko, anunciou que chegara a un acordo co presidente ruso Vladímir Putin para “evitar derramamento de sangue” e dar garantías da súa seguridade e ás súas forzas.

Wagner comezou a retirada das súas forzas de Rostov do Don  e o Kremlin informa que o xefe do grupo ruso de mercenarios Yevgueni Prigozhin, marchará a Belarús.

Prigozhin rebelouse contra o réxime ruso de Vladímir Putin, tras meses enfrontado coa súa cúpula militar. A última hora do venres, cruzou a fronteira de Ucraína cara ao interior de Rusia e, sen resistencia, fíxose coa cidade de Rostov do Don, onde tomou o control das instalacións militares.

A columna de mercenarios entrou na rexión de Lipetsk, a uns 400 quilómetros ao sur de Moscova, segundo as autoridades locais, que afirmaron estar a destruír seccións de estrada para impedir o paso de vehículos.

Pasadas as 17:00 (hora galega), o alcalde de Moscova, Serguéi Sobyánin, pediu á cidadanía que reduza “todo o posible” os seus desprazamentos e declarou o luns como día non laborable.

Con anterioridade, o presidente ruso, Vladímir Putin, nunha mensaxe televisada acusou de “traizón” os mercenarios, afirmou que serán castigados e anunciou que deu as ordes necesarias ao exército para restablecer a orde.  Dixo que habería respostas "brutais" ante a rebelión.

En resposta, Prigozhin publicou un audio no que afirma que non se renderá e falou de “guerra civil”. En Kíiv, o presidente ucraíno, Volodímir Zelenski, pediu aos rusos que depoñan a Putin. “Canto máis poida esconderse, máis perderedes”.

Estímase que uns 5.000 homes de Wagner estaban a aproximarse a Moscova este sábado.

Mentres, os Estados Unidos, Francia, Alemaña e o Reino Unido discutiron por teléfono a situación en Rusia. Os veciños de Rusia pecharon as fronteiras ante unha potencial escalada do conflito.