O macroincendio do Courel leva arrasadas 10.000 hectáreas e outras 1.100 o de Seceda
O macroincendio do Courel leva arrasadas 10.000 hectáreas e outras 1.100 o de Seceda
Os medios de extinción conseguen manter a salvo A Devesa da Rogueira, un espazo natural único en Europa
Unha semana ardendo e o macroincendio do Courel segue en situación de risco 2 pola proximidade a Parada dos Montes e Carballal, en Folgoso, e á parroquia do Busto na Pobra do Brollón.
"Levamos coa anguria xa unha semana, e os incendios non están controlados", di un veciño.
Temen que se reavive o vento, e que o lume "volva saltar". "Non se pode dicir nada" di un veciño de Seoane, porque asegura que "nunca vira un incendio así" nesta zona.
O avance do lume polo norte ameaza A Devesa da Rogueira. Os esforzos concéntranse en crear un perímetro de seguridade para protexer un espazo natural único. De momento está a salvo das lapas.
Polo sur, a loita céntrase en conter o lume para que non salte o río Lor. Por precaución, onte desaloxaron 54 veciños en Xestoso, Bustelo, Lamas e Vilar de Lor, no concello de Quiroga. Pero outros preferiron quedar.
"Os que podemos facer algo e conocemos o sitio, sabemos onde hai unha toma de auga ou unha mangueira, penso que non nos debían sacar", di un veciño de Vilar de Lor.
O macroincendio da Pobra e Folgoso leva arrasadas 10.000 hectáreas no Courel. Ao impacto ambiental e social únese o económico.
"Dou por finalizada a tempada", di o propietario do cámping O Courel, Xabier Trepat.
"Os turistas non queren vir a un sitio todo queimado", engade. A propietaria dunha casa de turismo rural en Vilar de Lor tamén rexistrou xa as primeiras cancelacións. "A xente viña gozar da paisaxe -explica- e agora isto parece unha paisaxe lunar".
No Courel segue tamén activo o incendio de Seceda, que se mantén nas 1.100 hectáreas queimadas e en risco 2 pola proximidade do lume ao núcleo de Gamiz.
