O mercado laboral suma 100.340 empregos no segundo mellor febreiro desde 2007

O número de afiliados á Seguridade Social aumentou en 100.340 persoas, o segundo maior incremento nun mes de febreiro desde 2007, ata alcanzar os 21,19 millóns de traballadores, grazas ás achegas da educación, a hostalería e a construción.

O número de persoas rexistradas nas oficinas do paro diminuíu en 5.994 desempregados, ata situarse nas 2.593.449 persoas, a cifra máis baixa contabilizada nun mes de febreiro nos últimos 17 anos, segundo os datos publicados polos ministerios de Traballo e de Inclusión.

Respecto ao ano pasado, a afiliación á Seguridade Social aumentou en 487.773 persoas, en tanto que o número de desempregados se reduciu en 166.959.

Díaz celebra os datos de paro de febreiro, os "máis baixos" en 17 anos: "Por fin, boas noticias"

A vicepresidenta segunda e ministra de Traballo e Economía, Yolanda Díaz, celebrou os datos de paro rexistrado de febreiro, coa cifra "máis baixa" para este mes nos últimos 17 anos.

"Por fin, boas noticias (...). As cifras son moi positivas", felicitouse Díaz, quen se mostrou "prudente" e "con moderación" ante as 2.590.000 persoas que aínda están en desemprego a día de hoxe en España, o que considera, na súa maioría, "paro estrutural".

En declaracións a RTVE recollidas por Europa Press, Díaz asegurou que mentres que existan familias que teñen aos seus membros en paro, vai seguir traballando para tentar reducir esa cifra.

Galicia é a terceira comunidade autónoma onde máis baixou o paro en febreiro en termos absolutos

A nosa é a terceira comunidade autónoma onde máis baixou o paro en febreiro en termos absolutos, por detrás de Andalucía e o Principado de Asturias. O desemprego reduciuse en 343 persoas, ata as 120.977.

Pola contra, o paro subiu en Madrid, Canarias, Castela-A Mancha, Murcia, Estremadura, a Comunidade Foral de Navarra, A Rioxa e a cidade autónoma de Melilla.

En Galicia, houbo 4.858 novos afiliados á Seguridade Social respecto a xaneiro, o que supón un incremento do 0,46 %.

O conselleiro de Traballo; José González, sinala que estamos nas cifras máis altas de cotización á Seguridade Social desde 2007 que amosan "o dinamismo do mercado laboral galego".

Por sectores, o desemprego reduciuse no noso país sobre todo nos servizos, no colectivo sen emprego anterior, na industria e, en menor medida, na construción e na agricultura.