O músico e actor Kris Kristofferson morre aos 88 anos

Kris Kristofferson, lenda da música country e gañador do Globo de Ouro como mellor actor, morreu este domingo aos 88 anos na súa casa en Hawai, informou este domingo a portavoz da familia.

O artista texano faleceu en paz rodeado da súa familia na súa casa de Maui (Hawai), informou Ebie McFarland, portavoz da estrela.

Kristofferson marcou un fito na música country e formou parte dos Highwaymen, que xunto a Waylon Jennings, Willie Nelson e Johnny Cash, reuniu en 1985 os mellores cantantes do country no seu momento.

Nado como Kristoffer Kristofferson en Brownsville, Texas, o 22 de xuño de 1936, o músico "cambiou a linguaxe da música country” ao tocar temas socialmente progresistas, destacou o seu representante.

O artista marcou unha etapa na música estadounidense, a revista Rolling Stone considerouno como “un dos mellores compositores de todos os tempos” ao estender a súa influencia máis aló dos límites da música country.

Achegouse á música ao traballar no mantemento de Columbia Records, o estudo en que gravaban algúns dos seus artistas máis admirados, como Johnny Cash ou Bob Dylan.

Iso foi tras abandonar unha prometedora carreira no exército que o levou ata Alemaña a principios dos 60, e que lle viña de influxo familiar.

Estudou literatura na Universidade de Oxford, e eses coñecementos servíronlle para compoñer os seus temas unha vez que renunciou á vida militar.

Uns temas que, tras saltar á fama a finais dos 60, interpretarían máis de 450 artistas ao cabo dunha década, cando xa dera tamén o salto á gran pantalla.

E é que Kristofferson non foi soamente cantautor, senón que tamén marcou unha era en Hollywood, onde participou en máis de 70 películas, entre as que figura Naceu unha estrela (A Star Is Born), de 1976, en que compartiu pantalla con Barbra Streisand e que lle valeu un Globo de Ouro como mellor actor.

Tamén participou na saga Blade e nunha serie de importantes títulos, aínda que realmente o que marcou a súa vida foi a música.

Á súa autoría pertencen clásicos como "Sunday Mornin' Comin' Down", "Help Me Make it Through the Night", "For the Good Times" ou "Me and Bobby McGee".