O número total de parados baixa dos 2,7 millóns por primeira vez en 15 anos

O número de parados rexistrados nas oficinas dos servizos públicos de emprego baixou en 50.268 persoas en xuño en relación ao mes anterior, un 1,8 % menos, impulsado, sobre todo, polo sector servizos, que concentrou case o 84 % da caída do desemprego.

Deste xeito, ao finalizar xuño, o número total de parados baixou por primeira vez en 15 anos dos 2,7 millóns. En concreto, o primeiro semestre do ano terminou con 2.688.842 persoas en paro, a súa menor cifra desde setembro de 2008, segundo datos publicados este martes polo Ministerio de Traballo e Economía Social.

O Departamento que dirixe Yolanda Díaz destacou que o descenso de xuño foi de carácter "xeneralizado", pois afectou practicamente a todos os sectores económicos, a todas as franxas de idade e a ambos os sexos.

Ademais, o Ministerio subliñou que, con xuño, acumúlanse xa 14 meses consecutivos en que o desemprego se atopa por baixo da barreira dos tres millóns de parados.
 

Bos datos tamén en Galicia

Galicia rexistrou 8.245 afiliados novos á Seguridade Social no mes de xuño, un 0,77 % máis que o mes anterior, o cal supón o triplo da media de España, que quedou no 0,26 %, e deixa o número total de afiliados na comunidade autónoma en 1.067.230. 

Ademais, o paro descendeu en Galicia en xuño en 5.410 persoas, un 4,02 %, máis do dobre que no conxunto de España, onde o descenso foi do 1,84 % respecto ao mes anterior, segundo os datos divulgados este martes polos Ministerios de Traballo, e de Inclusión, Seguridade Social e Migracións. 

O paro baixou en xuño en Galicia sobre todo nos servizos, onde houbo 4.203 desempregados menos que o mes anterior, é dicir, case catro de cada cinco persoas que abandonaron o Servizo Público de Emprego (SEPE) neste período.

Mínimo histórico do desemprego xuvenil

A vicepresidenta segunda e ministra de Traballo, Yolanda Díaz, celebrou que o paro caese o pasado mes de xuño por baixo dos 2,7 millóns por primeira vez desde 2008 e destacou que, no caso do desemprego xuvenil, o dato "é o máis baixo da historia".

"É a mellor noticia que podiamos dar", valorou a tamén líder de Sumar.

Indicou que España achégase aos 21 millóns de afiliados á Seguridade Social "mellorando a calidade do emprego".

Díaz reivindicou que as políticas do Goberno, como a reforma laboral e as subidas do salario mínimo interprofesional, "son un indicador de que as políticas públicas están a funcionar polo ben do país".

Con todo, a titular de Traballo apuntou que "mentres exista unha familia que teña un membro da súa casa en desemprego hai que seguir traballando".

A candidata de Sumar sinalou que o "reto de país" neste momento é "converxer" coa taxa media de desemprego da Unión Europea.