Morre en prisión o opositor ruso Alexéi Navalni

O líder opositor ruso, Alexéi Navalni, morreu este venres de maneira repentina na prisión ártica na que se atopaba desde decembro pasado, segundo informaron os servizos penais de Rusia.

"Practicáronselle os necesarios procedementos de reanimación, que non deron ningún resultado. Os médicos de urxencias constataron a morte do condenado. Están a establecerse as causas do falecemento", sinala o comunicado oficial sobre o deceso de Navalni, de 47 anos. 

A fonte explicou que este venres despois de dar un paseo na penitenciaría IK-3 da localidade de Jarp (distrito autónomo Yamalo-Nénets) o político opositor "sentiuse mal", tras o que "perdeu o coñecemento".

Destacou que os equipos médicos de urxencia acudiron de inmediato á prisión para atender a Navalni, que cumpría case 30 anos de cárcere por diversos delitos.

Seguidamente, os servizos penais anunciaron o envío dunha comisión de funcionarios de prisións e médicos desde Moscova para esclarecer as causas e circunstancias que rodearon o falecemento do reo.

A portavoz de Navalni, Kira Yarmish, asegurou que os correlixionarios do opositor non teñen aínda confirmación do deceso e que o seu avogado partirá en breve cara a Yamalo-Nénets.

Unha vez transcendeu a noticia, desde o Kremlin aseguraron que non teñen información sobre as causas da morte en prisión de Navalni, anunciou este venres o portavoz da Presidencia rusa, Dmitri Peskov, minutos despois de coñecerse a noticia sobre o falecemento do político.

"Os médicos teñen que aclaralo", dixo Peskov, citado pola axencia TASS", despois de que os servizos penais confirmasen a morte do coñecido opositor.

Peskov agregou que o Servizo Penal ruso encárgase agora de levar a cabo as comprobacións necesarias nestes casos, o que non require emitir "instrucións adicionais".

Á vez, Peskov confirmou que o presidente ruso, Vladímir Putin, ao que Navalni acusaba de encargar o seu envelenamento en 2020, foi informado sobre o falecemento do opositor.

Traslado de prisión

En decembro pasado, Navalni foi trasladado desde un cárcere na rexión de Vladímir, a menos de 200 quilómetros de Moscova, ata unha prisión no círculo polar Ártico, preto da cordilleira dos Urais. 

A localidade de Jarp, que ten uns 6.000 habitantes, atópase a case 2.000 quilómetros de Moscova ou unhas 45 horas en tren desde a capital rusa.

Segundo un dos seus colaboradores no exilio, Iván Zhdánov, o cárcere leva o nome de "Lobo polar" e é considerada unha das prisións máis afastadas da civilización de toda Rusia.

Navalni, que regresou a Rusia en 2021 tras ser envelenado o ano anterior, segundo os seus aliados, polo Servizo Federal de Seguridade, foi trasladado tras anunciar unha campaña contra a reelección do presidente ruso, Vladímir Putin, no poder desde o ano 2000.

O proceso do traslado a outra prisión, coñecido como "etapirovanie", pode prolongarse durante semanas, tempo no que o recluso adoita estar incomunicado.

Tanto os Estados Unidos como a Unión Europea ou Amnistía Internacional expresaron a súa inquietude pola sorte de Navalni, inimigo número uno do Kremlin.

O pasado 7 de decembro, Navalni pediu desde o cárcere votar contra Putin nas eleccións do 17 de marzo de 2024.

Navalni tamén anunciou a posta en marcha dunha páxina web (neputin.org) que pedía aos rusos apoiar a calquera candidato á presidencia, salvo a Putin.