O paradoxo dos salarios e a subida do SMI, por Maite Cancelo

O INE acaba de publicar a enquisa de estrutura salarial que nos lanza un salario medio anual de case 26.500 euros por traballador no ano 2022, un 4,1 % máis con relación ao ano anterior. A fenda entre homes e mulleres persiste, xa que o das segundas non alcanzou os 24.400 mentres que o dos homes superou os 29.000, sendo o salario feminino case o 83 % do masculino.

Con todo, se se analiza a distribución salarial hai moitos máis traballadores nos salarios baixos que nos soldos máis elevados. O propio INE sinala que o salario mediano, o que divide o número de traballadores en dúas partes iguais (salario superior e inferior), situouse en 22.383 euros mentres que o modal, o que cobraría a maioría dos asalariados, sitúase en case 14.600 euros.

A primeira conclusión é que o aumento do SMI desprazou a traballadores de salarios baixos ao intervalo 14.000-15.000, polo que se converteu no máis frecuente, e aínda que aumentaron os dous seguintes intervalos, fixérono en menor medida.

Se se analiza a porcentaxe de traballadores con relación ao SMI, o 17 % cobrarían do 0 ao 1, os que cobran dúas veces este valor son o 48 %, mentres que, no terceiro tramo, ata tres veces o salario mínimo, sitúanse o 20 % do total (e descendendo con relación ao ano anterior). Aumentan, pois, o número de traballadores cobrando os dous primeiros tramos á conta de que se reducen os que cobran en tramos máis elevados

Por sectores económicos e tipo de ocupación

A enquisa tamén nos dá as diferenzas de salarios medios anuais nos distintos sectores da economía. O maior atópase no de subministración de enerxía eléctrica, gas, vapor e aire acondicionado, con 55.470 euros por traballador, ou o de actividades financeiras e de seguros, con máis de 47.200 euros

No lado contrario, atopamos os sectores en que se concentran máis traballadoras e inmigrantes, como o de hostalería, cunha media de 16.274 euros, lembremos que son os que teñen menor produtividade e menor formación das persoas ocupadas.

Se se analiza a ocupación, destacan os directores e xerentes (case un 121 % superior ao resto), pero, como é lóxico, os profesionais técnicos, científicos e intelectuais. A formación ten unha clara influencia no salario para percibir.

Un apuntamento final

Ademais do anterior, nos salarios o goberno fixa por lei, tras as negociacións cos sindicatos e a patronal, o salario mínimo interprofesional que vai percibir o traballador, pero os outros tramos salariais establécense polas táboas do convenio colectivo ao que pertence cada empresa, que é distinta non só en función da categoría profesional do empregado senón do sector ou da localización xeográfica.

Pero estes convenios colectivos non se aplican a todas as empresas. Neste mesmo ano, 2022, asináronse 1.584 convenios, que chegaron a algo máis de 3,9 millóns de traballadores, pero dado que o número total de afiliados á seguridade social foi de algo máis de 20 millóns, boten as contas e atoparán algunha explicación adicional ao paradoxo dos salarios das mencionadas anteriormente.