O Senado veta a lei de amnistía, que volverá ao Congreso para a súa aprobación definitiva
O Senado veta a lei de amnistía, que volverá ao Congreso para a súa aprobación definitiva
O veto saíu adiante con 149 votos a favor e 113 en contra
A previsión é que o pleno da cámara baixa aprobe a norma dentro de varias semanas
![](https://img-g24-crtvg.flumotion.com/prog24/2024/20240514/PLENOSENADODITAMELEIAMNISTIA2405141155.01_frame_514959.jpg)
O pleno do Senado aprobou este martes o veto do PP á proposición de lei de amnistía, que deberá volver ao Congreso para recibir a luz verde definitiva e entrar en vigor. Como era previsible dada a maioría absoluta dos populares na cámara alta, o veto saíu adiante con 149 votos a favor e 113 en contra.
O debate non deparou sorpresas: PP, Vox e UPN cargaron contra unha lei que consideran inconstitucional e que supón o pago de Pedro Sánchez aos independentistas para seguir na Moncloa, mentres que o resto de formacións, co PSOE á cabeza, defendérona como unha aposta pola convivencia e a normalización política en Cataluña.
ERC e Junts avisaron ao PSOE de que a amnistía non pon fin ás súas reivindicacións.
"Logramos a amnistía, e imos polo referendo de autodeterminación", manifestou a senadora de ERC Sara Bailac.
"Quero deixar moi claro, e especialmente ao Partido Socialista, que o único que deixamos atrás é a represión e a inxustiza, o demais segue presente", recalcou desde as filas de Junts Josep Lluís Cleries.
A maioría dos portavoces criticaron o PP por alongar a tramitación da lei no Senado, un "teatro" que servirá de pouco xa que o veto será previsiblemente levantado por maioría absoluta cando a proposición regrese ao pleno do Congreso.
Pero os populares, que este martes pediron deixar sen efecto o conflito de atribucións que expuxeron hai un mes ao Congreso, aseguraron que seguirán cumprimento coa súa "obriga" e denunciando que "isto non é unha amnistía de convivencia, senón unha amnistía de pura conveniencia", en palabras do seu senador Antonio Silván.
A voceira do grupo popular, Alicia García, advertiu ao presidente do Goberno de que, tras as eleccións de Cataluña, é aínda maior a súa dependencia dos independentistas: "A aposta de Sánchez é Illa ou Puigdemont?", preguntouse.
Para as filas socialistas, os resultados das eleccións catalás son unha mostra do fracaso da estratexia dos populares e "poñen de manifesto que España non rompe, que Cataluña non se vai", afirmou Toni Magdaleno. Os socialistas defenderon o seu proxecto federalista apostando por deixar atrás o conflito e abrir un futuro de diálogo e acordo.
Só Unión do Pobo Navarro e Vox uniron a súa voz á do PP en contra da amnistía, mentres que o resto de portavoces, desde PNV a EH Bildu, Geroa Bai ou Más Madrid apoiaron unha norma que aposta por afrontar desde a política os conflitos territoriais.
O veto defendido por Vox, que xa foi rexeitado polo PP na fase de comisión, non chegou a ser votado no pleno ao aprobarse primeiro o dos populares. O seu portavoz, Paloma Gómez, denunciou o propósito "premeditado" de Sánchez de infrinxir a Constitución.
O veto do PP foi aprobado finalmente polos 144 senadores do PP, os tres de Vox, a de UPN e o da Agrupación Herreña Independente. O senador de Coalición Canaria, Pedro Sanginés, non participou na votación.
A previsión é que o pleno da Cámara Baixa aprobe a norma dentro de dúas ou tres semanas.