O PP aposta polo goberno en minoría tras a ruptura de Vox en cinco comunidades autónomas
O PP aposta polo goberno en minoría tras a ruptura de Vox en cinco comunidades autónomas
Os populares ven beneficios na decisión de Santiago Abascal
Feijóo asegura que as chantaxes non funcionan co seu partido
![Feijóo dixo este venres que Vox](https://img-g24-crtvg.flumotion.com/prog24/2024/20240713/Feij.jpg)
Os populares desbotan adiantar as eleccións e apostan por seguir gobernando en minoría ata o final da lexislatura nas comunidades onde pactaran con Vox. Segundo Alberto Núñez Feijóo, as chantaxes non funcionan co seu partido.
O Partido Popular encaixou con optimismo a ruptura decidida por Vox en cinco autonomías e, de acordo con EFE, na dirección nacional consideran que o movemento de Santiago Abascal pode serlles beneficioso.
Na sede nacional do PP viviuse con sorpresa e desconcerto o paso dado por Abascal. Ata o último momento houbo escepticismo respecto ao cumprimento da súa ameaza de rachar pola acollida de menores migrantes non acompañados nas distintas autonomías.
A lectura en Xénova, e así o trasladan en privado diferentes membros da dirección segundo EFE, é que Abascal cometeu un erro de cálculo ao romper agora, cando falta tempo ata unhas novas eleccións e o PP pode seguir gobernando, aínda que non sen dificultades, en minoría.
Pasouse "de freada", dixo este venres Feijóo. Como factores para a decisión tomada, apuntan no PP á presión que exerce sobre Vox o novo partido de Luis 'Alvise' Pérez, e ao xiro dado na Unión Europea, onde Vox se sumou ao grupo de Viktor Orban e Marine Le Pen.
Con todo, varias fontes recoñecen que estas razóns non parecen suficientes para xustificar o paso dado por Abascal, cualificado por Feijóo como "disparatado".
Tamén consideran na dirección do PP que quedou roto o relato de Pedro Sánchez sobre que Feijóo cede ante as presións de Vox e do sector máis conservador do PP, que os socialistas personifican nas figuras de Isabel Díaz Ayuso ou o expresidente José María Aznar.
En apenas un mes o PP pactou co PSOE a renovación do Consello Xeral do Poder Xudicial, xunto cunha reforma da lei para atallar a politización, e plantouse ante a esixencia de Vox de non aceptar a acollida de menores migrantes.
Centro político
En Xénova, que sempre aspirou a gobernos en solitario, cren que a súa posición queda reforzada no centro político e que se deu unha imaxe de partido de Estado fronte ao "populismo" de Vox e a política de "fronteiras abertas" que atribúen ao Goberno.
A Vox repróchanlle ademais que roubara foco aos casos de presunta corrupción que afectan o presidente do Goberno.
Por outra banda, cren entre as filas do PP que Vox perde galóns ao mostrar que é un partido para protestar e non para gobernar e alentan a idea dun cuestionamento interno a Abascal, polas fugas ao PP de segundos espadas e tras a saída dalgúns dos seus dirixentes máis moderados.
Ademais, lembran dous precedentes: Ciudadanos, que desapareceu tras ser o socio minoritario do PP en varios territorios e tras desafiar a este partido con mocións de censura; e o comportamento de Vox na Comunidade de Madrid, onde Ayuso logrou maioría absoluta tras endurecer este partido a súa postura fronte á presidenta madrileña.
O optimismo non oculta, con todo, os riscos que para o PP entraña esta ruptura, pois o líder de Vox puxo fin á etapa de entendemento que iniciou coa chegada de Feijóo ao liderado e a distancia entre ambos os dous partidos dificulta o acordo a futuro.
Cando foi Pablo Casado quen dixo basta a Abascal, abundaban as voces no PP que sostiñan que era un erro non entenderse con Vox, aínda que agora é Abascal quen rompe.
Dereita dividida
O movemento de Abascal é, por outra banda, a confirmación de que a dereita volve estar dividida en tres, porque mostra que Alvise preocupa máis aló de ser un outsider que irrompe nunhas eleccións europeas. E a división penaliza nas urnas.
O PP enfróntase ademais nas autonomías nas que goberna á inestabilidade parlamentaria que esta formación adoita afear a Pedro Sánchez, pois os seus dirixentes non teñen agora votos suficientes para aprobar orzamentos ou novas leis.
Agora, queda por ver se a ruptura se estende aos concellos. E tamén aparece a incógnita de se o paso dado por Abascal reforza a Feijóo no centro político, como cren os seus, ou se a competencia no campo da dereita obriga a facer novos cambios discursivos.
![O líder de Vox no Congreso dos Deputados o pasado xoves. EFE](https://img-g24-crtvg.flumotion.com/prog24/2024/20240713/abascal.jpg)
Crise interna en Vox
A decisión de romper os pactos de goberno autonómico co PP tamén ten consecuencias internas no partido de Abascal. As discrepancias no seo da formación avivan o medo a que algúns dos seus dirixentes autonómicos decidan engrosar as filas populares.
En Estremadura, o conselleiro de Vox Ignacio Higuero deuse de baixa do partido, e vai seguir no goberno da popular María Guardiola. En Castela e León, tres conselleiros de Vox querían seguir no Goberno, pero o presidente Fernández-Mañueco decidiu manter a un só.