O PP pide a dimisión de Tezanos por un artigo sobre os resultados electorais en Galicia
O PP pide a dimisión de Tezanos por un artigo sobre os resultados electorais en Galicia
Tezanos atribúe nese artigo a vitoria popular en Galicia ás axudas que repartiu o partido en campaña
O Partido Popular de Galicia pediu este martes a dimisión do presidente do Centro de Investigacións Sociolóxicas (CIS), José Félix Tezanos, pola publicación dun artigo sobre os resultados das eleccións galegas do 18 de febreiro.
Os populares critican que este artigo atribúa a vitoria do PP ao “enorme activismo” que se produciu na campaña galega “con gratificacións económicas extraordinarias ás mariscadoras, mensaxes enviadas ao persoal sanitario prometendo melloras salariais e organizativas, monxiñas organizando o voto dos seus asilados e internos”.
O PP considera que esta análise é un insulto aos galegos e que minimiza a "derrota sen paliativos" do socialismo na Comunidade.
Mediante un comunicado remitido aos medios, a número dous do PPdeG, Paula Prado, pediu a Tezanos “que deixe de enganar e insultar os galegos”.
Prado cre que “quen pense que unha maioría absoluta con máis de 700.000 votos e un apoio superior ao 47 % se consegue porque os galegos son estúpidos e se deixan enganar, nin coñece Galicia nin lle importa".
O deputado electo e candidato do PSdeG o 18F, José Ramón Gómez Besteiro, evitou entrar na polémica e rexeitou facer valoracións sobre "quen votou e por que" ao PP.
En todo caso, prometeu unha estratexia política para defender e beneficiar a todos os galegos con independencia de a quen se vote.
A acción política dos socialistas estará dirixida igualmente "ás persoas que menciona” Tezanos no texto e “que tamén teñen que ser receptoras da mensaxe do PSOE os próximos catro anos".
