O presidente Biden indulta o seu fillo Hunter por consideralo vítima de ataques políticos

O presidente estadounidense Joe Biden anunciou este domingo que asinou un indulto a favor do seu fillo Hunter Biden, que en xuño foi achado culpable de tres delitos relacionados con posesión de armas, ao ocultar na compra a súa adición ás drogas, por considerar que os seus problemas xudiciais foron instigados polos seus rivais políticos.

"Ningunha persoa razoable que mire os feitos nos casos de Hunter pode chegar a outra conclusión ca a de que Hunter foi posto na mira só porque é o meu fillo, e iso está mal", indicou Biden nun comunicado, no que asegura que o seu fillo foi "imputado de maneira selectiva e inxusta".

O presidente Biden reiterara en varias ocasións que non utilizaría a prerrogativa do perdón presidencial para resolver os problemas legais do seu único fillo vivo, que tamén se declarou culpable de evasión fiscal nun tribunal federal de California.

Hunter Biden fora declarado culpable de mentir nun formulario para obter unha arma no estado de Delaware ao asegurar que non era consumidor de drogas e posuír esa arma durante só 11 días e sen que fose usada nun delito, algo que o mandatario dixo que "case nunca é levado a xuízo con cargos penais".

"Os cargos no seu caso só xurdiron despois de que varios dos meus opoñentes políticos no Congreso instigasen ataques contra min e en oposición á miña elección", indicou o presidente Biden.

"Foi un intento de romper a Hunter, que leva cinco anos e medio sobrio, incluso enfrontándose a ataques sen descanso e persecución selectiva. Ao tentar crebar a Hunter tamén tentaban romperme a min", lamentou o mandatario estadounidense.

Reacción de Donald Trump

O presidente electo Donald Trump, pola súa banda, reaccionou e aproveitou o anuncio do indulto para pedir na rede social Truth o mesmo trato aos condenados polo asalto ao Capitolio do 6 de xaneiro de 2021, cando un xentío violento a favor do republicano asaltou ese edificio para evitar que os lexisladores certificasen os votos electorais de Joe Biden, gañador das eleccións de 2020.

"Ese perdón outorgado por Joe a Hunter inclúe os reféns do 6X (6 de xaneiro), que estiveron en prisión durante anos? Que abuso e fracaso da Xustiza!", exclamou Trump, que prometeu perdoar os que asaltaron o Capitolio en defensa dunha vitoria electoral que non obtivo. Más de 1.500 persoas foron imputadas por aqueles feitos.

O caso máis serio para Hunter Biden era o dos nove cargos dos que se declarou culpable en setembro por evasión fiscal, xa que ao ter antecedentes penais polo seu caso de posesión de armas en Delaware podía enfrontarse ata a 17 anos en prisión.

Os problemas legais de Hunter Biden puxeron ante a opinión pública un escuro período da vida do fillo do presidente pola súa profunda adicción ás drogas, sobre todo tras a morte en 2015 do seu irmán e primoxénito do presidente por un cancro.

Esa traxedia afectou profundamente tamén a Joe Biden, que xa pasara por outro episodio duro tras a morte da súa primeira muller e da súa filla de tan só un ano nun accidente de tráfico en 1972, no que resultaron feridos Beau e Hunter Biden.

O perdón chega nun momento sen risco político para o presidente, que tras renunciar á súa reelección este verán e aos seus 82 anos abandonará a vida política o 20 de xaneiro, cando asuma o cargo o presidente electo Donald Trump.