O prezo dos carburantes e a luz segue á alza ás portas do Nadal

O prezo medio do litro de diésel ascendeu esta semana ata os 1,432 euros, encarecendo un 0,06% con respecto aos 1,431 euros de hai sete días, para encadear a súa sexta semana á alza, 
Pola súa banda, a gasolina encarece un 0,13%, para situarse en 1,515 euros.

No caso do prezo da gasolina sitúase así en máximos desde a segunda semana de setembro, mentres que para o diésel hai que retroceder principios dese mesmo mes para atopar un prezo superior ao actual.

Ata mediados do pasado mes de outubro, os carburantes chegaran a sumar un abaratamento do 8,9 %, no caso da gasolina, e do 9,2 % para o diésel, coincidindo co período vacacional de verán e no que máis desprazamentos por estrada adoita haber en todo o ano.

O prezo medio de ambos os carburantes arrinca 2024 rexistrando as súas primeiras subidas en tres meses, despois de acumular un descenso tras outro desde finais de setembro de 2023. 
Despedindo o ano pasado en niveis mínimos do exercicio, sumando un abaratamento de case o 15 % no caso da gasolina e de máis do 13 % para o diésel.

Cos prezos actuais, encher un depósito medio de 55 litros de diésel ten un custo duns 78,76 euros, uns 5,2 euros menos que nas mesmas datas do ano pasado, cando ascendía a uns 83,98 euros.

Para os vehículos de gasolina, encher un depósito medio (55 litros) supón un desembolso actualmente duns 83,32 euros, ao redor de 2,36 euros menos que na mesma semana de decembro de 2023, momento no que o prezo era de 85,69 euros.

A electricidade ás portas do Nadal

O prezo diario do mercado eléctrico español sitúase nunha media de 115,33 euros por megawatt hora (MWh) nos 17 primeiros días do mes de decembro, sendo así un 10,4 % máis alto que o pasado novembro (104,43 euro/MWh) e un 59,8 % superior ao de hai un ano (72,17 euro/MWh).

Segundo datos do Grupo ASE, os ciclos combinados de gas aumentaron a súa actividade un 91 % para responder á demanda, ante a baixada das temperaturas, e compensar a baixa produción eólica e dunha nuclear minguada pola parada dos reactores de Ascó. Interveñen na fixación de prezos en todas as horas do día.

Así, como os prezos internacionais do gas están caros, a maior presenza dos ciclos impulsou os prezos da electricidade en España, que alcanzaron máximos de hai 22 meses.

Desta maneira, no que vai de decembro, a demanda de electricidade situouse en 712 xigawatts hora ao día, un 4 % máis alta que hai un ano. Ademais, supera nun 2,2 % a media do últimos cinco anos.

Este incremento do consumo en decembro provocará que 2024 se peche cun lixeiro incremento da demanda, do 1% respecto ao ano anterior, rompendo así unha mala serie de tres anos consecutivos de baixada.

Para o que resta de mes de decembro, os analistas de grupo ASE estiman que os prezos da electricidade situaranse por baixo dos 100 euros/MWh a próxima semana, grazas á esperada moderación da demanda e ao prognóstico dun aumento da xeración eólica.