O príncipe Henrique poderá levar a xuízo a 'The Sun' por presunta actividade ilícita

O príncipe Henrique, fillo menor do rei Carlos III e a falecida princesa Diana, poderá levar a xuízo a News Group Newspapers (NGN), propietario de The Sun e o desaparecido News of The World, por presunta actividade ilícita na obtención de información sobre el.

Así o determinou este xoves o xuíz Timothy Fancourt, despois de que nunha vista en abril o grupo xornalístico pedíselle que desestimase a demanda -que incluía tamén acusacións de interceptación de teléfonos- polo feito de que Henrique tardara máis dos seis anos preceptivos en presentala.

No seu ditame de hoxe, o maxistrado do Tribunal Superior descarta, non obstante, que poidan proceder a xuízo as alegacións concretas de escoitas ilegais, ao concluír que, nese caso, o duque non podería fundamentar por que esperou ata 2018 para querelarse, cando supostamente empezaran a mediados dos anos 1990.

O xuíz decidiu que si pode ser xulgada a parte da demanda que aduce que os xornais recorreron a actividades ilícitas "para extraer información confidencial de terceiros", coa posible "contratación de investigadores privados para realizar estes e outros actos ilegais".

Un portavoz de News Group Newspapersd eclarou que o ditame é "unha vitoria significativa" para a compañía, ao desestimar o tribunal as acusacións relativas ás escoitas das mensaxes de voz dos móbiles.

"Isto reduce substancialmente o alcance da reclamación", afirmou nun comunicado.

O escándalo de escoitas masivas a famosos, políticos e xente corrente obrigou a Murdoch a pechar en 2011 o News of The World, tras a detención e procesamento de varios directivos.

Está previsto que o xuízo contra NGN, que se suma a outros que Henrique ten en marcha contra outros xornais polo mesmo asunto, empece no Tribunal Superior de Londres o ano próximo.