O PSOE expulsa a nova alcaldesa do Irixo por participar na moción de censura xunto ao PP

A dirección provincial do PSOE de Ourense expulsou do grupo municipal socialista ás súas dúas representantes no concello do Irixo: a alcaldesa Rosa Dalama e a concelleira María Dolores Fariñas. Isto ocorreu despois de que ambas as dúas apoiasen xunto ao PP a moción de censura que elevou unha delas á alcaldía.

Así o confirmaron fontes socialistas, que precisaron que é a única medida que o partido pode tomar, tendo en conta que as dúas son independentes e non militan no Partido Socialista a pesar de que se presentaron coas súas siglas ás municipais.

A dirección ourensá do partido pediu que dita expulsión se notifique ao Concello, de forma que as concelleiras aludidas deixen de formar parte do grupo socialista e utilizar as siglas e o nome do partido na súa futura actuación corporativa.

En concreto, este luns, a socialista Rosa Dalama converteuse na terceira alcaldesa do concello ourensán do Irixo en ano e medio. Cambiando ata tres veces de rexedor en pouco máis de ano e medio desde o inicio do mandato ao prosperar a moción de censura entre PSOE e PP para derrocar a Susana Iglesias de Xuntos polo Irixo

Os seis votos que sumaron populares e socialistas (desautorizados estes últimos polo seu partido a nivel provincial) no pleno extraordinario celebrado na mañá do luns bastaron para arrebatar o bastón de mando a Iglesias, que chegara á alcaldía no verán de 2023, apenas dous meses despois do inicio do mandato, grazas ao apoio dos edís do PSOE.