Detido en Carballo por golpear na cabeza outro home cunha barra de ferro
Detido en Carballo por golpear na cabeza outro home cunha barra de ferro
O pai do agresor tamén participou na liorta e todos os implicados teñen antecedentes
A vítima quedou inconsciente e tivo que ser trasladada ao hospital
Un home foi detido en Carballo por golpear cunha barra de ferro na cabeza a outro. A agresión tivo lugar a plena luz do día nunha rúa do centro da vila.
A agresión foi ás tres e media da tarde na rúa Vázquez de Parga, onde aínda quedou un charco co sangue da vítima, un home de 53 anos. Tivo que ser evacuado en ambulancia ao hospital da Coruña despois de ser golpeado cunha barra de ferro que lle abriu unha gran brecha na cabeza ata deixalo inconsciente.
O suposto agresor é un home de 26 anos, alcumado o Apache. Este discutiu coa vítima no lugar antes da agresión. Os motivos da liorta descoñécense.
O Apache foi apresado pola Policía Local e levado a comparecer ante o xuíz. Segundo apuntan algunhas testemuñas, o pai do detido, alcumado o Indio, tamén participou na agresión.
Todos os implicados na liorta, tanto os agresores como o agredido, teñen antecedentes.
