O PSOE inicia este venres o seu 41 Congreso en Sevilla, marcado pola saída de Lobato e as acusacións de Aldama

O PSOE inicia este venres o seu 41 Congreso Federal, no que o partido pechará filas e  se debruzará no apoio ao seu líder, o presidente do Goberno e secretario xeral Pedro Sánchez, que volverá ser elixido nun conclave marcado pola abrupta dimisión do líder en Madrid Juan Lobato e polas acusacións do comisionista Víctor de Aldama, que apuntan directamente á cúpula do partido.

O debate ideolóxico e de emendas, co financiamento autonómico e o encaixe do pacto con ERC para dar un trato singular a Cataluña como punto máis importante, queda en segundo plano tras unhas semanas previas convulsas que obrigan aos socialistas a mirar de esguello o que ocorre nos xulgados.

De feito a comparecencia de Lobato ante o Tribunal Supremo producirase este mesmo venres, só unhas horas antes do comezo do Congreso en Sevilla. Os socialistas pretendían ademais despregar unha posta en escena espectacular, similar a unha Convención do Partido Demócrata estadounidense, pero as circunstancias e a proximidade da catástrofe provocada pola DINA en Valencia previsiblemente obrigarán a optar por un formato máis austero.

Aldama acusou a Cerdán de recibir cartos en metálico

Do Congreso sairá unha nova Executiva Federal e está por ver se Sánchez mantén no seu posto os seus principais colaboradores, a vicesecretaria xeral María Jesús Montero e o secretario de Organización Santos Cerdán, nun momento especialmente delicado para ambos despois de seren sinalados en sede xudicial por Aldama.

O presunto conseguidor acusou a Cerdán de recibir un sobre con 15.000 euros nun bar situado en fronte da sede do partido na rúa Ferraz e dixo que o xefe de gabinete de Montero, Carlos Moreno, quedou con outros 25.000 euros como compensación por un favor relacionado co aprazamento duns pagos a empresas por parte de Facenda.

Os socialistas quereláronse contra Aldama e esixíronlle que achegue probas. Con todo, o principal beneficiado pola presunta trama corrupta sería o exministro e exsecretario de Organización José Luis Ábalos, agora deostado polo PSOE e ao bordo da expulsión. A pesar de todo, o PSOE ten difícil abstraerse dos indicios que pesan sobre el, se se ten en conta que no último Congreso Federal, celebrado en Valencia en 2021, era o socialista que acumulaba máis poder á excepción do propio Pedro Sánchez.

Lobato dimitiu tras apuntar a Moncloa

En todo caso, o máis inmediato que terá que sortear o PSOE no seu Congreso será a declaración ante o Supremo de Lobato, que dimitiu este mércores despois de admitir que levou ante notario unhas conversacións coa xefa de gabinete do ministro Óscar López, que nese momento era á súa vez xefe de gabinete de Sánchez.

Lobato recibiu de Pilar Sánchez Acera un correo electrónico con datos fiscais do mozo da presidenta da Comunidad de Madrid Isabel Díaz Ayuso, cuxa filtración está a ser investigada como posible delito de revelación de segredos.

O que diga ante o xuíz será clave para saber o papel que xogou Moncloa na distribución do documento e a implicación de Sánchez Acero e Óscar López, que ademais é o principal aspirante a substituílo á fronte do PSOE de Madrid.

Outra fronte xudicial aberta afecta o irmán do presidente do Goberno, David Sánchez, e o secretario xeral do PSOE de Estremadura, Miguel Ángel Gallardo, despois de que ambos fosen citados a declarar como investigados por un xulgado de Badaxoz por presuntos delitos de prevaricación, tráfico de influencias e contra a Facenda Pública.

Vivenda, desinformación e cambio climático

Os socialistas, con todo, tentarán deixar a un lado este panorama xudicial e centrarse no desenvolvemento do Congreso, ao que chegaron máis de 6.000 emendas das federacións e que tras os debates da fin de semana acordará un documento que será a guía ideolóxica para os próximos catro anos.

Ademais da clásica discusión sobre monarquía ou república, o PSOE terá que tomar posición sobre asuntos como a expulsión do partido dos clientes de prostitución ou o xiro histórico do Goberno sobre o Sáhara Occidental, entre outros, e fixará doutrina en temas clave para o partido como os conflitos en Ucraína e Oriente Medio, a vivenda, a desinformación ou o cambio climático.

De feito, ao longo do sábado, cando se inaugura de forma oficial o 41 Congreso Federal, que elixiu como lema España adianta pola esquerda, varios ministros e dirixentes socialistas, como o titular de Exteriores José Manuel Albares, a vicepresidenta primeira María Jesús Montero, a vicepresidenta terceira Sara Aagesen e o expresidente José Luis Rodríguez Zapatero, intervirán en distintos paneis temáticos sobre algúns dos asuntos mencionados.

Ao mesmo tempo, levarán a cabo os traballos das comisións que darán luz verde ou tombarán as mocións trasladadas polas federacións. As que finalmente sexan aprobadas incorporaranse ao documento final, base do corpus ideolóxico do PSOE ata 2028. Finalmente, o domingo levará a cabo a votación dos órganos federais e o PSOE poñerá fin ao 41 Congreso coa intervención do secretario xeral.