O PSOE reúnese en Suíza con Puigdemont para restaurar as relacións con Junts
O PSOE reúnese en Suíza con Puigdemont para restaurar as relacións con Junts
Os socialistas manteñen unha liña de discreción arredor deste encontro
Un dos referentes políticos desta fin de semana é a xuntanza entre os socialistas e Puigdemont en Suíza para tentar reconducir as relacións con Junts, deterioradas nos últimos meses tras a investidura de Salvador Illa en Cataluña.
A delegación do PSOE está encabezada polo secretario de Organización, Santos Cerdán, e vai cun obxectivo: tender pontes para restablecer os apoios parlamentarios de Junts.
Os independentistas ameazaron esta mesma semana con máis votacións en contra do Goberno no Congreso se Puigdemont non logra a amnistía.
Os socialistas manteñen unha liña de discreción arredor deste encontro, como se manifesta nas declaracións do ministro Óscar López.
"O Partido Socialista sempre que tivo reunións confirmounas e explicounas con transparencia e normalidade. Polo tanto, será o PSOE o que confirme ou non as reunións que se produzan e dea conta delas. Esa é a diferenza co Partido Popular, que mantiveron sempre reunións e nunca soubemos de que falaron; por exemplo con Junts durante a investidura fracasada do señor Feijóo".
Críticas do PP
Sobre esta xuntanza, o Partido Popular critica que non se poida tratar o financiamento autonómico nunha conferencia de presidentes "mentres se negocian os presupostos xerais do Estado en Suíza con Puigdemont".
Esther Muñoz, vicesecretaria de Educación e Saúde do PP, considera dunha "irresponsabilidade absoluta" que Pedro Sánchez "só teña posta a mira naqueles socios que poden permitirlle seguir no poder e que abandone o resto dos cidadáns".
