O Rácing, ao límite na defensa para recibir o Granada

Cristóbal Parralo compareceu na conferencia de prensa previa ao partido de mañá ante o Granada. Os ferroláns chegan coa recente nova da mancadura de Erick Cabaco, que sofre unha rotura musculotendinosa e estará fóra do equipo un tempo estimado entre dous e tres meses.

Cabaco súmase á baixa de David Castro na mesma posición, non obstante, Cristóbal engadiu que este último está a recuperarse ben. Segundo afirmou, o club está a valorar se reforzar a zaga de cara ao peche do mercado dada a sensible situación que teñen actualmente, con unicamente dous centrais en disposición de xogar. Un destes é Aleksa Puric, que a ollos de Cristóbal está a "traballar ben" e "presta moita atención", o que facilita a súa adaptación ao Rácing e ás esixencias de Parralo. 

Outro nome propio é Manu Vallejo, que se incorporou ás filas racinguistas nesta semana e que, tras adestrar hoxe por primeira vez, estará na convocatoria de mañá. Iso si, Cristóbal aclarou que non se atopa polo momento en condicións de disputar os noventa minutos. Sobre a perla da canteira ferrolá, Cristóbal aclarou que David Carballo seguirá a adestrar co primeiro equipo durante toda a temporada ao tempo que poida compaxinar partidos coa súa categoría e algunha posible convocatoria co primeiro equipo. 

O técnico do Rácing deixou claro que mañá visitará a Malata un equipo que, de manter o seu cadro de xogadores ao final do mercado, distínguese como un dos claros favoritos a pelexar polo ascenso. Precisamente sobre volver a xogar na casa, Cristóbal mostrouse incómodo pois, ao seu ver, isto supón certa presión para o equipo. 

Por último, unha das lecturas máis positivas que se sacaron do debut en liga foi o potente xogo aéreo que demostrou o Rácing. Parralo destacounos como "importantísimas". Para el, estas "meten nun estrés importante ao outro equipo en cada falta, córner..."

O partido, mañá ás 17:00 na Malata ante o Granada C. F.