O Racing continúa na onda positiva (1-1)
O Racing continúa na onda positiva (1-1)
Empate no difícil campo do Burgos igualando o gol local con un de Gelardo
O Racing sumou a cuarta xornada sen perder e logrou un empate no campo do Burgos (1-1). Comezou perdendo logo dun gol marcado por Borja Sánchez mediado o primeiro tempo pero conseguiu empatar no engadido dese período inicial grazas a Aitor Gelardo.
Non houbo moitas oportunidades na primeira parte. O gol de Borja chegou no primeiro disparo entre os tres paus de calquera dos dous equipos. O Racing reaccionou, a piques estivo de igualar nun remate de Álvaro Giménez e conseguiuno cun gol de Gelardo tras unha gran xogada de Correa.
No segundo tempo a prioridade dos dous equipos foi a seguridade defensiva, pero houbo un par de ocasións moi claras. Lisandro estrelou un balón no traveseiro da porta de Jesús Ruíz e Manu Vallejo rematou de cabeza na área pequena por riba do marco local. O balón parado foi unha das armas do Racing e Naldo cabeceou desviado noutra boa ocasión, cando xa se superara o minuto oitenta.
