O Real Madrid, Yamal, Nadal, Biles ou Duplantis, premiados nos Laureus

Madrid acolleu a gala dos Premios Laureus nos que se recoñecen aos mellores deportistas ou equipos do ano 2024. No tocante ao deporte individual houbo dous grandes gañadores. A ximnasta Simone Biles levou o premio á mellor deportista feminina e o saltador Mondo Duplantis acadou o de mellor deportista masculino. 

O Real Madrid levou outro dos galardóns principais ao seren recoñecidos como o mellor equipo de 2024. A Liga e a Champions acadadas na pasada temporada resultaron fundamentais para levar o premio. Lamine Yamal, que non puido estar presente no acto, conseguiu o de irrupción mundial máis significativa despois de gañar a Eurocopa con España e converterse nun dos mellores futbolistas do mundo con só 17 anos. 

A ximnasta brasileira Rebeca Andrade conseguiu o premio Laureus á reaparición do ano, o surfista Kelly Slater o premio á traxectoria, a atleta Yuyan Jiang o de mellor deportista con discapacidade e o ciclista Tom Pidcock o de mellor deportista de acción. Faltaba o de Icona Deportiva e ese recaeu en Rafa Nadal, retirado en 2024 despois dunha brillante traxectoria profesional chea de éxitos.