Sánchez acepta o encargo da investidura e di que "é a hora da xenerosidade para resolver o problema de Cataluña"

O presidente do Goberno en funcións, Pedro Sánchez, aceptou este martes a proposta do rei Filipe VI, como xefe do Estado, de someter a súa candidatura a unha segunda investidura logo do intento fracasado do líder do PP, Alberto Núñez Feijóo.

Sánchez, nunha comparecencia na Moncloa, dixo que quere iniciar mañá mesmo "sen tempo que perder" as conversas coas formacións políticas, que comezarán coa líder de Sumar, Yolanda Díaz.

O secretario xeral dos socialistas adiantou así os pasos que vai dar tras converterse no candidato á investidura, que se inician con esa reunión no Congreso coa vicepresidenta do Executivo, coa que aspira a reeditar o goberno de coalición.

Agregou que a rolda de contactos se retomará pasados os cumios que se celebran en Granada esta semana e que na mesma estarán todos os representantes doutros partidos fóra de Vox.

Asegurou Pedro Sánchez que entre os grupos chamados a eses contactos tamén estará o Partido Popular, pero, dixo, "non para pedirlle o voto, senón para pedirlle que cumpran a lei e a Constitución", en referencia á renovación do Consello Xeral do Poder Xudicial.

En canto a Cataluña e ás esixencias dos grupos independentistas, Sánchez afirmou que é a hora da "xenerosidade", o "compromiso", o "liderado" e a "política" para resolver o problema político de Cataluña e para sacar adiante a investidura e asegurou que cando finalice a rolda de contactos cos grupos parlamentarios "fixará posición" sobre as súas esixencias.

Sánchez rexeitou expresamente un referendo de autodeterminación en Cataluña e defendeu a "difícil" decisión que tomou sobre os indultos aos condenados polo 'procés' porque, hoxe, pode constatar "que foi acertada" e ben tomada en aras do interese xeral.

Sánchez asegurou, en calquera caso, que os pactos que poida alcanzar para a súa investidura e para toda a lexislatura serán transparentes e serán referendados polo poder lexislativo e "seguro" ata polo Tribunal Constitucional, que deberá pronunciarse para avalar a súa "absoluta garantía".

A Casa do Rei xustifica a designación de Sánchez pola súa "disposición"

A Casa do Rei emitiu un comunicado tras a rolda de consultas no que explica que Filipe VI optou por designar como candidato á investidura a Pedro Sánchez pola súa “disposición” para tentar formar goberno e tras non prosperar o intento previo do líder do PP, Alberto Núñez Feijóo.

O Palacio da Zarzuela lembra tamén que a Constitución establece no seu artigo 99 que "se tramitarán sucesivas propostas" no caso de que non logre a investidura do candidato proposto.

Por iso, conclúe que "do resultado da investidura anterior (a de Núñez Feijóo) e da disposición para ser candidato nun novo proceso de investidura" de Sánchez, o monarca propuxo a este para que trate de formar goberno, para o que ten de límite o 27 de novembro.

Armengol convocará o pleno de investidura só cando a negociación estea "madura"

A presidenta do Congreso, Francina Armengol, sinalou que só convocará un novo pleno de investidura coa candidatura de Pedro Sánchez á Presidencia do Goberno cando as negociacións políticas "estean maduras", aínda que advertiu de que a data máxima é o 27 de novembro.

Armengol compareceu no Congreso para comunicar a decisión do rei de propoñer como candidato á investidura ao secretario xeral do PSOE, Pedro Sánchez, no segundo intento para elixir presidente do Goberno tras o intento de Alberto Núñez Feijóo.

Unha designación que Armengol tratará con Sánchez para fixar a data do novo pleno de investidura e que ten como data máxima o 27 de novembro, xa que lembrou que o reloxo se puxo en marcha tras o fracaso da primeira votación para investir a Feijóo.

"Os tempos estaban moi marcados e taxados, tense ata o 27... e entendo que agora hai que facer as negociacións oportunas para poder facer unha investidura con apoios suficientes e que saia adiante".

Feijóo avisa de que Sánchez conta agora con menos apoios que antes

O líder do PP, Alberto Núñez Feijóo, avisou de que "nos esperan semanas de escuras negociacións" e "moitas mentiras" e advertiu de que Pedro Sánchez conta hoxe con menos apoios dos que dispoñía fai catro semanas para a súa investidura.

Feijóo compareceu no Congreso despois de acudir á Zarzuela, onde o rei concluíu con el a segunda rolda de consultas para propoñer un candidato á investidura. O líder do PP instou a Sánchez a especificar os seus apoios, porque é un "feito relevante" que "a súa candidatura ten de inicio menos respaldo parlamentario da que tiña hai un mes".

"Espérannos escuras negociacións, unha teatralización da política e espérannos mentiras e témome que serán moitas", avisou.

Feijóo advertiu de que "haberá moitas máis cesións que reformas e poxarase calquera principio, calquera institución do Estado e calquera compromiso electoral".

Por iso, engadiu, o proxecto que lidere Sánchez "reeditará e agravará o peor Goberno" que tivo España en 45 anos, pero o PP, subliñou, "non vai fallar" aos españois.