Rueda trasládalle ao rei que "o pobo galego falou" e está cómodo no marco constitucional

O presidente da Xunta de Galicia, Alfonso Rueda, transmitiulle ao rei Filipe VI que "o pobo galego falou", e que expresou que se encontra cómodo dentro do marco constitucional.

O xefe do Estado recibiu este martes o presidente da Xunta de Galicia, Alfonso Rueda, logo de que tomara posesión do seu cargo hai pouco máis de tres semanas tras gañar o Partido Popular as eleccións autonómicas do pasado mes de febreiro por maioría absoluta.

Tras a audiencia real, Rueda relatou aos xornalistas a súa impresión do encontro e o que lle trasladou ao monarca. Para o presidente da Xunta nas eleccións pasadas tamén estaba en xogo o encaixe de Galicia dentro de España, e "o pobo galego falou, e creo que falou dun xeito maioritario", asegurou, "e creo que é bo, logo de ser posto en cuestión por algúns, dicirlle ao máximo representante de todos eses valores que maioritariamente o pobo galego segue pensando que Galicia ten que seguir indo por aí".

“É en España onde Galicia atopa a súa razón de ser, coas nosas particularidades e nosa forte identidade e a lealdade maioritaria do pobo galego á Coroa e ao que representa o papel constitucional do xefe do Estado. Recollo o sentimento maioritario do pobo galego”, remarcou o presidente da Xunta.

O encontro, que tivo lugar no Palacio da Zarzuela, enmárcase nas audiencias que o rei dispensa aos presidentes autonómicos cando acceden ao cargo. Co propio Rueda xa ocorrera así o 1 de xullo de 2022, despois de que relevase a Alberto Núñez Feijóo tras a súa marcha a Madrid para liderar o PP.

O rei saudou a Rueda no Salón de Audiencias e tras posar ante os medios gráficos, accederon ao despacho do rei para manter a xuntanza. "Benvido", díxolle o xefe do Estado ao estreitarlle a man.

Alfonso Rueda tamén comentou que "foi unha reunión extensa na que houbo tempo a falar de todo", e que percibiu que "o rei, como non pode ser doutra maneira, ten coñecemento e preocupación pola situación política".

"Creo que é consciente da situación que había en Galicia antes das eleccións e do escenario que se abre logo de que os galegos falaran", concluíu Rueda.

O presidente da Xunta agarda agora ser recibido polo presidente do Goberno, Pedro Sánchez, a quen de xeito inmediato dixo que lle vai solicitar un encontro para tratar "as reclamacións e as cousas que Galicia ten que achegar" e para reclamarlle que “se respecte a igualdade entre territorios nun momento no que podería estar en cuestión”.

“Galicia ten forza moral e argumentos dabondo para reclamar que este equilibrio territorial debe manterse por encima de todo. E todas as comunidades autónomas teñen que ter as mesmas regras de xogo”, defendeu Rueda. 

Rueda anticipou que como fixo hai dous anos, exporá a Sánchez unha orde do día co fin de que se poidan preparar con antelación os temas que vai poñer sobre a mesa e a reunión sexa “operativa” e de traballo, á marxe do contido institucional.

Entre eses asuntos, expoñeralle algunhas demandas que lle trasladou na anterior entrevista, ao considerar que “non se resolveron na súa totalidade ou, directamente, seguen sen ser atendidas”.

Citou o financiamento autonómico, a distribución dos fondos de reconstrución da UE e o deseño e execución de infraestruturas.