O río atmosférico deixa chuvia por todas as comarcas de Galicia

Charcos, rúas molladas e, sobre todo, paraugas. Era a estampa por toda Galicia esta mañá. A intensa chuvia afectou sobre todo as provincias de Pontevedra e A Coruña nas primeiras horas do día e agárdase que pola tarde se intensifiquen no interior e a montaña. Nalgunhas zonas pódense recoller ata corenta litros por metro cadrado no espazo de doce horas.

Na montaña de Lugo hai situación de alerta amarela ata as nove da noite pola chuvia, xa que poderían caer ata 15 litros por metro cadrado en só unha hora. A parte positiva son as temperaturas altas para esta época, con máximas de 22 graos e mínimas que non baixarán de 16.

Este fenómeno dunha xornada de fortes precipitacións que se desprazan coñécese como río atmosférico.