O Supremo británico di que Escocia non pode convocar unilateralmente un referendo de independencia

O Tribunal Supremo do Reino Unido ditaminou este mércores que o Parlamento autónomo de Escocia non ten competencias para convocar un referendo de independencia consultivo sen o consentimento do Goberno de Londres, ao entender que se trata de "asuntos reservados ao Parlamento británico, como a Unión entre Escocia e Inglaterra".

Así o indicou hoxe o maxistrado Robert Reed ao expoñer o veredicto alcanzado polos cinco xuíces que en outubro escoitaron os argumentos de Edimburgo e Londres, puntualizando que se trata de "un ditame unánime, ao que se deu prioridade".

O xuíz recalcou que o veredicto "redunda no interese público" e que "non se trata dunha decisión política" sobre a independencia.

Na súa exposición, Reed considerou que o efecto dun referendo, aínda que non tivese como repercusión directa a independencia, "non está restrinxido ás súas consecuencias legais, senón que pode incluír as súas consecuencias prácticas".

"Esta corte conclúe de maneira unánime que o proposto proxecto de lei está relacionado cos asuntos reservados" e que, segundo isto, o Parlamento escocés "non ten potestade para lexislar sobre un referendo de independencia de Escocia".

O Supremo entende que a consulta que o Goberno nacionalista de Nicola Sturgeon quere celebrar o 19 de outubro de 2023 "tería consecuencias políticas importantes", e, por tanto, "reforzaría ou debilitaría a fortaleza democrática da Unión e apoiaría ou socavaría as credenciais democráticas" da causa independentista.

Ao detallar a posición do Supremo, o xuíz lembrou que o gobernante Partido Nacionalista Escocés (SNP) aludira ao dereito de autodeterminación e á lexislación internacional para defender o seu caso.

Neste sentido, rexeitou os argumentos presentados polo SNP, ao entender que ese dereito só pode ser invocado en excolonias ou por pobos que son oprimidos pola ocupación dunha forza estranxeira.

A ministra principal escocesa, Nicola Sturgeon, avanzara antes do fallo de hoxe que tiña intención de celebrar un plebiscito de independencia o 19 de outubro de 2023.

Entre os seus argumentos, Sturgeon sostén que o Brexit cambiou as condicións nas que os escoceses decidiron seguir formando parte do Reino Unido, polo que defende unha nova consulta, mentres que o Goberno de Londres cre que a cuestión quedou resolta polo menos durante "unha xeración". 

Sturgeon respecta a decisión pero seguirá a súa pelexa por referendo

Tras coñecer a decisión do Tribunal Supremo británico, a ministra principal de Escocia, Nicola Sturgeon, asegurou que a "respecta", aínda que manifestou que continuará a súa pelexa por celebrar o referendo.

"Aínda que estou decepcionada, respecto o ditame do Tribunal Supremo: non fai a lei, só a interpreta. Unha lei que non permite a Escocia elixir o seu futuro sen o consentimento de Westminster mostra que calquera noción de que o Reino Unido é unha asociación voluntaria é só un mito e isto é un argumento a favor da independencia", escribiu Sturgeon en Twitter.

Para a líder do Partido Nacional Escocés (SNP), a decisión xudicial de hoxe "pecha un camiño para que se escoite a voz de Escocia sobre a independencia, pero nunha democracia a nosa voz non pode e non será silenciada".