O Supremo xulgará o 13 de xaneiro a Baltar por circular a 215 quilómetros por hora

O Tribunal Supremo sinalou para o vindeiro 13 de xaneiro o xuízo contra o senador do PP Xosé Manuel Baltar Blanco por un presunto delito contra a seguridade viaria por conducir a 215 quilómetros por hora nun tramo limitado a 120 km/h na A-52 sentido Benavente (Zamora), o 23 de abril de 2023.

A Fiscalía pide unha multa de 1.800 euros e un ano de privación do carné de conducir por un delito contra a seguridade viaria, na modalidade de condución de vehículo de motor a velocidade superior en oitenta quilómetros por hora á legalmente permitida.

A maxistrada instrutora Ana Ferrer procesou a Baltar ao considerar que o actuado ata o momento permite afirmar que conducía pola A-52, cando ao alcanzar o punto quilométrico 66,900, dentro do termo municipal de Asturianos (Zamora), o aparello de medición alí instalado detectou que circulaba a 215 quilómetros por hora, nun tramo de velocidade limitada a 120. Ese mesmo día foi sancionado administrativamente.

Sinala que, aplicado a marxe de erro do 5 por cento que establece a normativa sobre os controis, o resultado é de 204 quilómetros por hora, polo que a maxistrada entende que os feitos revisten caracteres dun delito contra a seguridade viaria.

Na súa declaración ante a maxistrada, o tamén expresidente da Deputación de Ourense rexeitou cometer un delito contra a seguridade viaria, debido a que sostén que nunca pasou os 200 quilómetros por hora, o mínimo para que sexa considerado delito.

Respecto ás cuestións previas expostas pola defensa -que un mesmo feito non pode ser xulgado dúas veces e o principio de cousa xulgada-, o Supremo indica que se resolverán ao comezo do xuízo, como consta no auto de admisión de proba.