O TC anula a prioridade do éuscaro fronte ao castelán nos concellos vascos

 O pleno do Tribunal Constitucional anulou por inconstitucional a esixencia do uso prioritario do éuscaro nos concellos de Euskadi por menoscabar os dereitos lingüísticos dos seus membros.

A corte de garantías estimou así a cuestión de inconstitucionalidade promovida polo Tribunal Superior de Xustiza de País Vasco, en relación ao artigo 6.2 da Lei de institucións locais de Euskadi ao entender que establece a prevalencia do éuscaro sobre o castelán nos concellos. 

Nese artigo regúlase a lingua en que poderán ser redactadas as actas e os documentos emitidos polas entidades locais e establécese que poderán ser redactados en éuscaro, aínda que matiza que "sempre que non se lesionen os dereitos de ningún membro da entidade local que poida alegar validamente o descoñecemento do éuscaro".

O TSXV considera que a lei impide o dereito constitucional a utilizar o castelán libremente polos membros das entidades locais, en tanto que o Goberno vasco sostén que o Tribunal Constitucional xa sentenciou que as entidades locais poden utilizar tanto o éuscaro como o castelán con normalidade nas súas relacións internas ou nas súas comunicacións cos cidadáns. 

E agora o Constitucional sostén que a norma vasca, ao prescribir un uso prioritario do éuscaro, ocasiona un desequilibrio inxustificado e desproporcionado do uso do castelán, por establecer formalidades ou condicións para que os representantes dos entes locais poidan exercitar o seu dereito á libre opción.

É por iso que a sentenza declara a inconstitucionalidade e nulidade da esixencia de alegar validamente o descoñecemento do éuscaro para que se poida exercer a opción lingüística.