O temporal destrúe un veleiro encallado en Xove

A marea baixa deixa ao descuberto nesta praia de Lago, en Xove, os mil anacos do que era un pequeno veleiro. A embarcación levaba un tempo fondeada na zona ata que os últimos temporais a fixeron encallar.

"Onde estaba en Foz non tiña perigo, é ría e non tiña perigo ningún. Veuse para aquí e xa é mar aberto, colleuno o temporal e pasou o que pasou".

Trátase dun caso singular. O veleiro xa pasara o verán fondeado na ría de Foz, chamando a atención dos veciños da zona.

"Este verán estivo na ría de Foz dous ou tres meses. Eu ao rapaz non o vin nunca. Estaba alí e era moi raro ver tanto tempo o barco parado. Agora xa non queda nada da embarcación, é unha historia curiosa".

Pola zona vaga agora o seu único tripulante, un home de pouco máis de trinta anos e que fala francés.

"Eu non lle poño cara e non o coñezo, dixeron que era de fóra pero nada máis".

Hai quen o viu facendo fogueiras entre as dunas do areal e din que se refuxia nunha casa abandonada e vaise facendo con algún que outro alimento nas hortas veciñais.