O universo "friki" ten unha cita no Palexco da Coruña con Hobbycon

Xogos de mesa de destreza, xincanas, combates, concursos e obradoiros como un onde experimentar e aprender caligrafía chinesa da man do profesor de chinés da Escola Oficial de Idiomas da Coruña Modesto Corderi.

"É máis doado do que parece porque nós aprendemos cuns idiogramas e con axudas, por exemplo, de debuxos".   

O maior evento friki da Coruña volve coa súa edición de verán sen perder a súa esencia temática: os cómics, o anime, o manga ou o cosplay ao que se apuntan moitos mozos e mozas caracterizados dos seus personaxes preferidos.

Precisamente o concurso de cosplay deste sábado será un dos pratos fortes. Na área de videoxogos, as ultimas novidades, realidade virtual e tamén consolas de todos os tempos.

"Segue habendo contido para os da nosa idade, con consolas retro que nos interesan moito a nós ou exposicións interesantes, pero para os máis novos tamén hai contido de moita actividade movida, moitas xincana", detalla José Luis Macía, membro da organización da Hobbycon.

Hobbycon chega ao seu décimo aniversario como unha das citas de referencia no sector.