Poxa de xovencas na Semana Gandeira de Mazaricos

Desde as once da mañá por este recinto foron pasando as 18 xovencas que participaron na poxa procedentes de Santa Comba, Outes, A Laracha, Toques, Trazo e Mazaricos. Cada animal foi exhibido ante o público asistente ata seren adxudicados ao mellor postor. 

"Somos un concello produtor de leite. Aquí vivimos da gandería e a xente traballa as súas terras como sempre. E é unha cousa da que sentirse orgullosos. Esta poxa ten 18 animais de primeira calidade onde os gandeiros poden comprar a bo prezo e coa seguridade de que son animais de primeira calidade", asegura Juan José Blanco, alcalde de Mazaricos.

"É a demostración da excelente gandería de leite que temos na comarca de Mazaricos e noutras zonas de Galicia", di a conselleira do Medio Rural, María Xosé Gómez.

Ademais da poxa, nesta semana gandeira celebráronse xornadas técnicas do sector lácteo, exposición de maquinaria e produtos agrícolas e gandeiros, e concursos relacionados co sector.