O verán galego frea polo momento a tempada de incendios forestais

Aínda que as previsións falaban dun verán máis cálido e seco do normal en Galicia,  polo momento non se están cumprindo. As choivas e a humidade rexistradas en xullo están a atrasar a proliferación dos temidos incendios forestais. Mais o estío é longo e non convén confiarse.

"Dentro desta normalidade, desta primavera que é certo que foi chuviosa, pois como todos os anos estamos preparados e atentos ao que sucede. A meteoroloxía é un factor, pero o principal é a intencionalidade e temos que estar pendentes. Isto dun día para outro pode cambiar moi rápido", asegura Manuel Rodríguez, director xeral de Defensa do Monte da Xunta. 

A Xunta cuantificaba o ano pasado preto de 7.000 as hectáreas ardidas en Galicia fronte as máis de 50.000 rexistradas o ano anterior. Con eses números o plan de defensa contra o lume céntrase este ano no operativo humano e na vixilancia.

"Baséase no aumento de traballo dos fixos descontinuos e logo, de afondar nas cousas que funcionan. Estamos a espallar a rede de videovixilancia nos montes, que acreditou a súa eficacia tanto na vixilancia coma na coordinación de medios", confirma o director xeral de Defensa do Monte.

Os técnicos tamén están a se fixar nos lumes producidos fóra de tempada que, malia que non é un fenómeno novo, estase a comprobar que son máis virulentos que antano por mor de primaveras e outonos anormalmente secos.

Incendios coma os de Trabada ou Baleira o ano pasado, con máis de 2.000 hectáreas queimadas en outubro e marzo, téñense en conta a hora de planificar a loita contra os lumes no monte.