O xuíz do caso Koldo non ve polo de agora motivos para imputar o exministro Ábalos

O xuíz do caso Koldo, que investiga a adxudicación dunha serie de contratos públicos de máscaras en plena pandemia, considera que "a día da data non existen motivos bastantes" para solicitar ao Tribunal Supremo a imputación do exministro de Transportes José Luis Ábalos.

Nun auto datado este luns, o maxistrado da Audiencia Nacional Ismael Moreno rexeita a petición da acusación que exerce a asociación Iustitia Europa para que elevase unha exposición razoada ao Tribunal Supremo co obxectivo de investigar o exministro socialista, que goza de aforamento ao ser deputado.

O xuíz explica que aínda se deben practicar varias dilixencias de investigación, como a rolda de declaracións de testemuñas e investigados prevista esta semana ou informes policiais sobre os dispositivos intervidos.

Por tanto, di o maxistrado, "a día da data non existen motivos bastantes para elevar exposición razoada" ao Supremo, "sen prexuízo do que puidese resultar nun futuro, como consecuencia das dilixencias que se practiquen e do devir da instrución".

O maxistrado acolle así o criterio que expuxo o fiscal anticorrupción Luís Pastor, que tampouco viu "suficientes indicios que puidesen amparar" o xuíz para pedir ao Supremo investigar a Ábalos.

O que si aceptou o xuíz é a petición doutra das acusacións, Liberum, de citar como testemuña o director financeiro e de control de Adif, Manuel Fresno, o próximo 16 de setembro.

Esta mesma semana o maxistrado ten previsto interrogar como investigados dous exaltos cargos de organismos dependentes do Ministerio de Transportes: o exdirector xeneral de Xestión de Persoas de Adif, Michaux Miranda, e o exsecretario xeral de Portos do Estado Álvaro Sánchez Manzanares, que foi cesado tras o estalido da causa.

Tamén está prevista a declaración de diversas testemuñas, como o directivo de Globalia Javier Hidalgo ou varios altos cargos de Portos do Estado.

A última declaración programada, xa o 23 de setembro, é a do xa exsubsecretario de Transportes Jesús Manuel Gómez, cesado polo ministro Óscar Puente hai unhas semanas.

A Fiscalía cre que os tres exaltos cargos investigados exerceron "certas presións" sobre responsables que debían adxudicar contratos de máscaras "sen ningunha opción de rebater a decisión final de adxudicación" á empresa Soluciones de Gestión, sobre a que pivota a investigación. 

José Luis Ábalos considera que o informe publicado polo Ministerio de Transportes sobre a súa xestión non é inocente e que ten como obxectivo contaminar a investigación xudicial. Ábalos admite tamén que se sente perseguido polo Goberno.