O xuíz responde a Begoña Gómez que segue investigando "dous bloques" da causa

O xuíz que leva o caso de Begoña Gómez respondeu á defensa que no seu xulgado segue investigando "dous bloques" que non teñen relación cos contratos adxudicados a sociedades do empresario Juan Carlos Barrabés, parte que demandou a Fiscalía Europea.

Nunha providencia, o maxistrado Juan Carlos Peinado responde así o escrito presentado pola defensa de Gómez, dirixida polo exministro Antonio Camacho. Neste solicitara ao xuíz que aclarase que feitos conforman a causa despois de que asumise a decisión da Fiscalía Europea de quedar coa parte relativa á adxudicación dos contratos financiados con fondos europeos pola entidade pública Red.es.

Peinado sinala que na resposta da Audiencia Provincial de Madrid ao recurso de Fiscalía no que pedía arquivar o caso non ten por que entenderse que rexeita que se siga investigando, por exemplo, o que ten relación cunha posible intervención de Gómez no rescate de Globalia.

"É unha interpretación subxectiva, que extrae unha conclusión interesada e non axustada á realidade, pois no auto que resolve o recurso de apelación non se contén esa afirmación, sen prexuízo de que se faga referencia a eses contratos como indicativos de claros indicios", apunta o xuíz.

En concreto, o auto da Audiencia Provincial sinalaba que na denuncia orixinaria da causa, a de Manos Limpias, existía "un primeiro bloque fáctico inverosímil ou con datos erróneos" e outro bloque referido ao rescate de Globalia "no que a relación da denunciada é, cos datos que se conta, unha simple conxectura máis aló de rechamantes coincidencias temporais e persoais".

Engadía que existía un terceiro bloque fáctico relativo ás axudas da UTE participada Innova Next SLU, de Barrabés, en que "si aparecen xa datos obxectivos suficientes que lexitiman o inicio da investigación".

Pero agora, o xuíz subliña que o auto da Audiencia Provincial de Madrid só tivo en consideración "o que no momento da interposición do citado recurso (do fiscal) constaba nas actuacións". É dicir, engade, só tivo en conta a denuncia de Manos Limpoas e as informacións de dous medios de comunicación.

"Nese momento carecíase dos novos documentos achegados polas testemuñas e do primeiro informe emitido polos axentes da Unidade Central Operativa (UCO) da Garda Civil, comisionados nas presentes dilixencias", lembra Peinado.

Así, lembra que aínda que a Fiscalía Europea quedou co concernente aos expedientes de Red.es cos que se fixo unha UTE participada por unha empresa de Barrabés, aínda quedan os outros dous bloques "que non concirnen a eses contratos".

Precisamente, nun deses bloques, o relativo ao rescate de Globalia, a propia Audiencia Provincial dicía no seu auto que era "unha simple conxectura" pero considerando os datos cos que contaba o tribunal para analizalo. Matizaba que poderían chegar novos datos e que en todo caso "quizais merecese activar controis administrativos previos garantes dos principios de transparencia e bo goberno".

Peinado, na súa nova providencia, lembra á defensa de Begoña Gómez que o segredo xa está levantado na causa, polo que pode consultar os feitos "polos que se segue levando a cabo as dilixencias de instrución, que son competencia deste Xulgado".

"Son todos os que constan nas actuacións, que, como se dixo, poden ser coñecidos cando estime conveniente, e aos que pode ter acceso en calquera momento a representación procesual da investigada", subliña.

Con esta decisión, o xuíz apontoa dalgunha forma a declaración como investigada de Begoña Gómez, prevista para o 5 de xullo.

A denuncia de Manos Limpias

Manos Limpias acusa na súa denuncia a Gómez de actuar "prevaléndose do seu status persoal" como esposa do presidente do Goberno: "Veu recomendando ou avalando por carta de recomendación coa súa sinatura empresarios que se presentaban a licitacións públicas".

Doutra banda, apuntaba que Víctor de Aldama, que está investigado pola Audiencia Nacional polo caso Koldo, era o contacto de Begoña Gómez en Globalia e gañou 6,67 millóns antes de que se negociase "o rescate (...) da compañía".

A isto sumaba que Air Europa "pactou pagar 40.000 euros ao ano ao África Center da denunciada" e que o acordo de Globalia e o Instituto de Empresa incluía a entrega de 15.000 euros ao ano en voos de primeira clase para Begoña Gómez e o seu equipo.

O informe da UCO

A finais do mes de maio transcendeu o informe elaborado pola UCO no que se descarta que a relación de Begoña Gómez co exconselleiro delegado de Globalia Javier Hidalgo favorecese o rescate da aeroliña da compañía por parte do Estado. Tamén descartaba que a súa intervención decantase adxudicacións a empresas do empresario Juan Carlos Barrabés.

No informe, os axentes indicaban que o único elemento que vincularía obxectivamente a Begoña Gómez con Globalia era o feito de que coincidiu con Hidalgo en dous eventos que tiveron lugar en xaneiro de 2020 nos que participaba a sociedade Wakalua, filial de Globalia.

Os axentes lembraban que Wakalua está relacionada co IE Africa Center do que era directora Begoña Gómez e que ambas as entidades asinaron un acordo días antes deses dous eventos. Pero resalta que "tampouco se ten constancia de que eses feitos puidesen estar vinculados á decisión ministerial do citado rescate" de Air Europa.

Doutra banda, a UCO, tras analizar os contratos públicos adxudicados a sociedades vinculadas ao empresario Juan Carlos Barrabés, concluía que nos tres expedientes da sociedade Innova Next con Red.es, que están no foco da investigación do xulgado, a empresa de Barrabés (ou a UTE coa que participaba) obtivo "a mellor puntuación" en criterios dependentes de xuízo de valor, cuxo peso no concurso era do 40 %. No apartado de criterios económicos (60 %) non foi, con todo, a primeira.