O xuíz rexeita a querela do PP contra o PSOE por financiamento irregular

O xuíz da Audiencia Nacional Santiago Pedraz rexeitou que haxa indicios suficientes para admitir a trámite a querela que interpuxo o PP contra o PSOE e varios imputados do denominado caso Koldo por presunto financiamento irregular.

O PP fundamentaba a súa querela nunha información xornalística baseada no testemuño dun empresario ao que non se identificaba, aínda que o maxistrado lembra que, "con carácter xeral, unha noticia por si soa, non lexitima ningún accionante popular para converter o relato xornalístico nun relato de feitos punibles causantes do proceso penal. Precísase algo máis". 

E ese "algo máis", di, "non se dá" na querela do PP, porque "do actuado ata a data na presente causa non aparece vinculación algunha co denunciado".

Non é que unha denuncia anónima non teña "plena validez para iniciar unha investigación", pero esta debe vir avalada por "datos corroboradores", explica o xuíz.

E fai súa unha conclusión da Sala do Penal do Supremo: a acción popular "non pode degradar o relevante papel que está chamada a desempeñar no proceso penal limitándose a converter noticias en causas criminais".

A querela dirixíase contra o PSOE, o empresario Víctor de Aldama e Koldo García, exasesor do que fora ministro socialista José Luis Ábalos, entre outros, por presuntos delitos de financiamento ilegal, branqueo de capitais, tráfico de influencias e suborno.

O escrito presentouse perante o xulgado que dirixe Santiago Pedraz porque se enmarca nas pescudas secretas que dirixe esta sede xudicial por unha presunta fraude de IVE de máis de 182 millóns no sector dos hidrocarburos.  

Os populares basearon a súa querela na información publicada o pasado 10 de outubro por The Objective, que recolle o testemuño de dous informantes anónimos, un dos cales asegurou que levou 90.000 euros á sede socialista de Ferraz en dúas entregas que se fixeron con bolsas de plástico en outubro de 2020. 

O obxectivo último, de acordo con estes testemuños, sería que a través da intermediación de De Aldama con Koldo García a empresa Villafuel conseguise o título de operador no sector de hidrocarburos, que finalmente obtivo.

Para o PP, "a presunta entrega de 90.000 euros en efectivo por un particular para a obtención dunha licenza administrativa na sede dun partido político" é un indicio bastante importante como para "iniciar unha investigación con tal de esclarecer a identidade do receptor e o destino dos fondos".

O PSOE presentará unha querela por inxurias e calumnias contra o PP

O PSOE presentará unha querela por inxurias e calumnias contra o PP tras esta decisión da Audiencia Nacional de non admitir a trámite a querela do PP en contra dos socialistas por suposta financiamento ilegal.

Así o anunciou a dirixente socialista Enma López nunha mensaxe enviada aos medios, na que resaltou que o PSOE estaba "moi tranquilo porque non había nada" na súa contra e "así o demostra" a decisión do xuíz da Audiencia Nacional Santiago Pedraz.

A xuízo do PSOE, esta decisión demostra que "non houbo nada", tal como viñan defendendo na última semana, que é o tempo que durou a querela do PP, presentada o pasado luns.

López carga ademais contra o PP e di que ese partido "sabe moi ben o que é o financiamento ilegal" e aínda así "non dubidou en presentar unha querela totalmente falsa baseada en recortes de xornal e en testemuños anónimos". 

O PP respecta a decisión, pero avisa: "O que importa é como acaba este caso"

O Partido Popular asegurou que "respecta" a decisión do xuíz Santiago Pedraz de inadmitir a súa querela contra o PSOE e advertiu de que "o que importa é como acaba este caso, non como empeza", segundo asegurou a formación nun comunicado.  

Segundo o PP, o xuíz inadmite a súa querela contra o PSOE por financiamento ilegal, "pero avanza que 'actuaría en consecuencia' se aparecen novas probas que ter en conta durante a instrución da causa".  

"O Partido Popular respecta a decisión da Audiencia Nacional, fronte a aqueles partidos que insultan, perseguen e amedrentan a aqueles xuíces que non lles dan a razón", sinalou a formación de Alberto Núñez Feijóo.