Detidas cen persoas nos actos de repulsa pola morte de Navalni en Rusia
Detidas cen persoas nos actos de repulsa pola morte de Navalni en Rusia
A policía tamén recolleu os datos de toda a xente que participou nas protestas, incluída a prensa
Polo menos 110 persoas foron detidas en diferentes cidades rusas durante os actos de repulsa pola morte en prisión do líder opositor, Alexéi Navalni, segundo informa OVD-Info, organización que vela polos dereitos dos opositores detidos.
Más da metade dos arrestos (69) practicáronse en San Petersburgo, cidade natal do presidente ruso, Vladimir Putin. O resto foron apresados en Moscova, Nizhni Nóvgorod, Krasnodar e outras localidades da parte europea de Rusia e de Siberia.
Ademais, a policía recolleu os datos persoais de todas as persoas participantes neses actos, incluídos os reporteiros que acudiron a cubrilos. As forzas da orde tentan desde o venres retirar todos os memoriais instalados polo país na honra de Navalni.
No exilio, milleiros de cidadáns rusos saíron á rúa para protestar polo que consideran un asasinato por encargo do Kremlin e convocaron para este sábado máis accións en cidades europeas, estadounidenses e de América Latina.
Inimigo número un
Navalni, de 47 anos, morreu o venres de xeito repentino na prisión ártica na que se atopaba desde decembro pasado, segundo informaron os servizos penais de Rusia. A oposición e a prensa independente rusa, xunto ás chancelerías occidentais acusaron a Putin de ordenar o asasinato.
Inimigo número un do Kremlin desde hai 15 anos, cumpría unha condena de case 30. Fora trasladado en decembro a unha prisión ártica despois de anunciar unha campaña contra a reelección de Putin nos comicios presidenciais de marzo.
O portavoz presidencia, Dmitri Peskov, considerou "inaceptables" as acusacións vertidas por Occidente antes de que se coñezan os resultados da autopsia.
