Os avogados da familia de Diego Bello piden trasladar os acusados do asasinato a Manila

Os avogados da familia do galego Diego Bello, asasinado nas Filipinas en 2020, pediron ao xuíz este mércores que traslade os tres policías acusados da súa morte desde a illa de Siargao a Manila, informou a EFE o letrado encargado da acusación.

"Tentaremos trasladar os tres policías a Manila para que poidan asistir ao xuízo en vivo", detallou o avogado Ian Malilong tras a primeira vista preliminar do xuízo en Manila, celebrado este mércores na capital filipina e onde os tres policías acusados seguiron a audiencia de maneira telemática desde Siargao.

"Na vista de hoxe tratamos de conciliar a información que temos e comezar a trasladarlla ao xuíz", detallou Malilong, quen engadiu que esperan unha próxima vista a mediados de outubro.

O Tribunal Supremo de Manila, a pedimento da defensa, decidiu o pasado 10 de agosto trasladar á capital das Filipinas o xuízo contra os policías Vicente Panuelos, Ronel Azarcón Pazos e Nido Boy Esmeralda, acusados de matar a Diego Bello na illa de Siargao o 8 de xaneiro de 2020.

Os acusados entregáronse ás autoridades filipinas o 6 de febreiro tras case un ano en paradoiro descoñecido fuxindo da xustiza e foron trasladados a Siargao, onde debía celebrarse o xuízo antes de que trasladase a Manila.

Os policías están acusados de asasinato e falsificación de probas pola fiscalía filipina tras senllos informes da Oficina Filipina de Investigación (NBI) e a Comisión de Dereitos Humanos, onde se desmontaban os argumentos dos axentes, que alegaron defensa propia tras matar a Diego Bello nunha suposta redada contra o narcotráfico.