Os centros de saúde de Galicia van contar con analizadores de sangue portátiles
Os centros de saúde de Galicia van contar con analizadores de sangue portátiles
É tecnoloxía dixital, que ofrece os resultados de forma inmediata e que aforra desprazamentos dos pacientes ao hospital
O Sergas decide adquirir estes aparatos tras o informe favorable do persoal sanitario, que os probou en varios centros de saúde
Xa non terán que ir a laboratorio necesariamente as analíticas urxentes para saber se un paciente está estable. Os niveis de sodio, potasio, creatinina ou hemoglobina poden coñecerse só 5 minutos despois da extracción.
"Van mandar dous aparatos por centro. E vai ser moi efectivo porque vai determinar unha serie de parámetros que antes tiñan que ser determinados no hospital", di María Jesús Rey, a coordinadora de servizo do Centro de Saúde de Vilalba.
Talía Álvarez, unha das enfermeiras de asistencia domiciliaria que probou estes analizadores sanguíneos, explica que o segundo tipo dos aparatos que van recibir en Atención Primaria serve para coñecer a evolución dos pacientes diabéticos, e tamén para distinguir entre unha infección vírica e unha bacteriana.
"Eu se vou na consulta domiciliaria cunha mostra ordinaria dime como ten o azucre nese momento, pero iso non quere dicir que pola tarde non estea alto. En cambio con este analizador vexo como estivo nos últimos meses e dáme unha guía de como está a seguir os tratamentos", explica Talía Álvarez, enfermeira do ESAD.
A chegada destes aparatos dixitais incrementará a capacidade diagnóstica en Atención Primaria e, segundo o persoal que os probou, achegará aos domicilios dos doentes unha atención máis completa e máis eficaz.
