A Cociña Económica de Ferrol terá un menú especial polo Nadal grazas á confraría de pescadores
A Cociña Económica de Ferrol terá un menú especial polo Nadal grazas á confraría de pescadores
Os mariscadores doan 150 vieiras á entidade benéfica
O patrón maior da confraría de Ferrol entregou esta mañá cinco caixas con 150 vieiras na Cociña Económica.
"Vieira porque é un produto noso e como veñen por unidades son moi doadas de repartir", explica Gustavo Chacartegui, o patrón maior da confraría.
Unha doazón que agradecen na entidade benéfica, e máis nestas datas.
"Aproveitamos un produto coma este, de calidade, para engadir ao menú deste sábado. O que teña que vir aquí vai notar máis non poder xantar na casa e por iso, nestas datas, nós procuramos facerlles un menú especial", di José Antonio Piñón, o secretario da Cociña Económica.
Fina será a encargada de preparar ese menú especial para os 120 comensais que acoden acotío ao comedor benéfico.
"Ao ser tantas, vounas facer ao forno que tamén están moi saborosas. E con moito cariño", explica Fina Rodríguez, a cociñeira da Cociña Económica.
O valor económico desta doazón ascende aos 450 euros e, deste xeito, os mariscadores ferroláns, un ano máis, axudan a Cociña Económica.
