Os consumidores cren que a eliminación do IVE do aceite queda nun pequeno respiro

Os lineais do aceite son os máis visitados do supermercado. "Din que hai cola", asegura unha clienta de supermercado. Pero a eliminación do IVE do aceite queda nun pequeno alivio para os consumidores.

"Eu véxoo igual que sempre. Non se nota moito", di unha consumidora.
 

O prezo do aceite acumula unha suba dun 150 % en dous anos. As asociacións de consumidores estiman que máis da metade das familias reduciron o consumo polos elevados prezos, que se traduciu nunha caída das vendas dun 20 %. Din que a medida é positiva, pero insuficiente.

"Supón unha media de redución de 50 céntimos por litro. Varía en función do prezo e da marca. É unha boa nova pero insuficiente porque tamén se tería que aplicar á carne e ao peixe", valora Enrique García. Portavoz da OCU.

Os produtores contan con que a próxima colleita veña paliar a falta de stock e os prezos poidan comezar a normalizarse a partir de outubro.

"É un alimento básico esencial e paréceme fenomenal que teña o 0 %. Non podemos volver ás manteigas. É saúde", asegura unha consumidora. "Eu por se acaso xa plantei unha oliveira no meu testo".

A partir de outubro o aceite recuperará un 2 % de IVE. E a partir 2025 será considerado alimento esencial dentro dos produtos co IVE superreducido.