O goberno británico anula parte do protocolo norirlandés pactado con Bruxelas

 O Goberno británico presentou este luns no Parlamento o proxecto de lei que pretende anular unilateralmente partes do protocolo subscrito coa Unión Europea sobre Irlanda do Norte que forma parte do acordo do Brexit.

Entre outras medidas, a nova lexislación prevé eliminar a xurisdición do Tribunal de Xustiza da UE (TXUE) sobre as disputas referidas a Irlanda do Norte.

O texto presentado pola ministra británica de Exteriores,  Liz  Truss, contempla a creación dun "carril verde" que eximiría de controis aduaneiros aos bens procedentes de Gran Bretaña destinados ao consumo en Irlanda do Norte, aínda que mantería un "carril vermello" reservado para os produtos dirixidos á República de Irlanda, integrada no mercado único comunitario.

De igual forma, propón que as empresas que só  comercian con Irlanda do Norte poidan elixir se se rexen pola regulación comunitaria ou a británica, e tamén prevé que se poidan aplicar nesa provincia os subsidios e desgravacións fiscais vixentes no resto do territorio británico.

O principal argumento do Executivo conservador de Boris Johnson para impulsar a lei é que coa aplicación actual do protocolo menoscábase o Acordo de Venres Santo, que levou a paz a Irlanda do Norte en 1998, ao impedir a formación dun goberno de poder compartido entre  unionistas e republicanos, como estipulaba ese documento.

“Este proxecto de lei defenderá o Acordo de  Belfast (Venres Santo) e apoiará a estabilidade política en Irlanda do Norte. Poñerá fin á situación insostible pola que os  norirlandeses reciben un trato diferente ao do resto do Reino Unido, protexerá a supremacía dos nosos tribunais e a nosa integridade territorial”, dixo  Truss ao presentar o proxecto.

Para Londres, a súa proposta é unha "solución práctica e razoable aos problemas que afronta Irlanda do Norte", aínda que se mostra disposto a renunciar a sacar o proxecto adiante se as negociacións coa UE aluman un resultado aceptable para todas as partes".

Na súa primeira reacción á presentación do proxecto de lei, a Comisión Europea rexeitou de plano renegociar o protocolo irlandés do acordo do Brexit, como lle esixe o Reino Unido, e advertiu de represalias contra este país se procede coa tramitación da lexislación para desactivar partes dese protocolo de maneira unilateral.

"Renegociar o protocolo non é realista. Non se atopou ningunha solución funcional para este equilibrio delicado e amplamente negociado. Calquera  renegociación supoñería maior incerteza para os cidadáns e empresas de Irlanda do Norte. Por estas razóns, a Unión Europea non renegociará o protocolo", dixo o vicepresidente da CE para Relacións Interinstitucionais,  Maros  Sefcovic.

O Goberno británico invocou un escuro principio xurídico, a chamada "doutrina da necesidade", para defender a legalidade do proxecto de lei co que recoñece que incumprirá partes do Protocolo de Irlanda do Norte subscrito coa Unión Europea.

"A doutrina da necesidade ofrece unha clara base no dereito internacional para xustificar o incumprimento das obrigacións internacionais baixo certas condicións excepcionais e limitadas", sinalou o Executivo no argumentario legal difundido en paralelo á presentación da lei no Parlamento.
 

A maioría dos deputados da Asemblea Autónoma de Irlanda do Norte asinou este luns unha carta dirixida ao primeiro ministro británico, Boris Johnson, en que censuran o proxecto de lei co que Londres quere incumprir de maneira unilateral os acordos do Brexit.

A carta enviada a Johnson leva a rúbrica de 52 dos 90 membros que compoñen a Asemblea de  Belfast, na que as formacións  unionistas protestantes manteñen diferentes posicións sobre este controvertido asunto.