Medra a tensión en Oriente Próximo tras o bombardeo israelí no Iemen
Medra a tensión en Oriente Próximo tras o bombardeo israelí no Iemen
Os rebeldes hutís reivindican o lanzamento de mísiles balísticos contra o sur de Israel
O exército israelí anuncia a interceptación dun foguete sobre o mar Vermello lanzado desde o Iemen
Israel bombardea o porto iemení de Al Hodeida tras o ataque cun dron sobre Tel Aviv
Os rebeldes hutís do Iemen reivindicaron este domingo o lanzamento de "varios mísiles balísticos" contra a localidade costeira de Eilat, no sur de Israel, despois de que o Estado xudeu bombardeara o porto iemení de Al Hodeida nun ataque que deixou cinco persoas mortas e 90 feridas graves.
O portavoz militar dos hutís, Yahya Sarea, dixo nun comunicado que o movemento apoiado por Irán lanzou unha batería de mísiles contra "obxectivos importantes" de Eilat, que non especificou, e que a operación foi realizada "con éxito".
A reivindicación prodúcese despois de que o Exército israelí anunciara a interceptación dun mísil terra-terra sobre o mar Vermello lanzado desde o Iemen. Segundo afirmou, o proxectil non entrou no seu territorio pero fixo soar as sirenas en Eilat pola posible caída de metralla.
![Membros das forzas de seguridade hutís en Saná, no Iemen. REUTERS/Khaled Abdullah](https://img-g24-crtvg.flumotion.com/prog24/2024/20240721/Iemen.jpg)