Os incendios levan calcinadas 7.500 hectáreas en Carballeda de Valdeorras e 8.600 en Folgoso do Caurel
Os incendios levan calcinadas 7.500 hectáreas en Carballeda de Valdeorras e 8.600 en Folgoso do Caurel
Os incendios levan calcinadas 7.500 hectáreas en Carballeda de Valdeorras e 8.600 en Folgoso do Caurel
Os incendios calcinaron xa 22.060 hectareas, 7.500 en Carballeda de Valdeorras e 8.600 entre a suma dos núcleos afectados en Folgoso, segundo o parte de Medio Rural con datos solicitados ata 19:30 de hoxe martes.
En Valdeorras, a noite unha vez máis volveu ser un inferno e o vento complicou a extinción. Na mesma provincia de Ourense, en Oímbra son 1.500 as hectáreas devastadas, en Vilariño de Conso 3.000 e en Ribadavia, 65.
Folgoso e a Pobra, un dos focos
O incendio que afecta a parroquia de Vilamor, no municipio de Folgoso do Courel, e Saa, na Pobra do Brollón, devorou 5.500 hectáreas entre ambos os municipios, segundo a información facilitada pola Consellería do Medio Rural.
Neste incendio foi preciso desaloxar máis de 900 persoas de 60 núcleos. E continúan as evacuacións. Polo momento, arderon dez construcións. Os últimos núcleos evacuados son seis, catro pertencen ao concello de Quiroga e dous ao de Folgoso do Courel.
Con todo, moitos dos veciños das 17 aldeas desaloxadas dos concellos de Folgoso e da Pobra regresaron ás súas casas. O pasado xoves un raio deu comezo ao seu inferno. Por sorte, as casas seguen en pé.
Continúa activo tamén en Folgoso do Courel o incendio que afecta á parroquia de Seceda, un lume que calcinou xa 1.100 hectáreas e que obrigou a activar o nivel 2 de alerta pola súa proximidade ao núcleo de Gamiz. Nos traballos de extinción dese incendio están a participar 19 axentes, 30 brigadas, 14 motobombas, 6 avións, 6 helicópteros e efectivos da UME.
Cervantes
Na Montaña lucense, en Cervantes, están estabilizados os incendios de Cereixedo e Noceda, que queimaron 165 hectáreas, aínda que o de Donís quedou controlado despois de arrasar unhas 75 hectáreas de monte.
Nese municipio están a traballar para sufocar o lume 22 axentes forestais, 3 técnicos e 34 brigadas, co apoio de 30 motobombas, 3 avións e 5 helicópteros.
Antas do Ulla e Palas de Rei
Na comarca da Ulloa segue controlado o incendio que afectou á parroquia de Santa Mariña do Castro de Amarante, en Antas de Ulla, que queimou 40 hectáreas.
Xa está controlado o lume que afecta á parroquia de Ramil, en Palas de Rei. Ese lume queimou 375 hectáreas e, nun momento determinado, chegou a provocar que se activase o nivel 2 de alerta pola súa proximidade a dous núcleos de poboación.
Quiroga
Tamén está controlado o de Outeiro, no municipio de Quiroga, na zona sur de Lugo, despois de arrasar 250 hectáreas, e estabilizado o de Nocedo, nese mesmo concello, tras queimar 15 hectáreas de monte.
Arde Valdeorras
O lume non deu descanso nin pola noite. Xa é toda a comarca. As lapas cruzaron o Sil e a zona cero pasou a estar no concello de Rubiá.
Traballan nos labores de extinción 11 avións, 10 helicópteros e 77 brigadas por terra pero segue incontrolable.
Dúas veciñas da Veiga da Cascallá (Rubiá) choran ao ver os danos que os lumes causaron ás vivendas. | EFE/Brais Lorenzo
Na zona arderon totalmente nas últimas horas unhas setenta construcións, contando alpendres e palleiros, pero tamén ata medio cento de vivendas habitadas. Desde onte desaloxáronse por máis ou menos tempo máis de cen núcleos de poboación.
A Xunta informaba ao mediodía de 7.500 hectáreas calcinadas. Na provincia de Ourense tamén hai outro incendio en Prado Albar na Serra do Invernadoiro.
Non hai casas, pero xa arderon máis de 2.500 hectáreas de parque natural.
Situación 2 en Oímbra, Carballeda, Pobra do Brollón e Folgoso
Medio Rural decretou como medida preventiva a situación 2 no incendio forestal activo en Oímbra (Ourense), no lugar de Rabal, pola proximidade do lume ao núcleo habitado de Feces de Cima, no veciño municipio de Verín.
A situación 2 tamén permanece en Carballeda, parroquia de Riodolas, ao reactivárense as chamas por un cambio de vento. Neste caso é pola proximidade ao lugar de Candeda.
Na provincia de Lugo, en Folgoso, seguen decretadas as situacións dúas en senllos lumes rexistrados en Vilamor e Seceda.
Tamén continúa activa esta medida na Pobra do Brollón, no lugar de Saa.
Carballeda de Valdeorras | EFE/Brais Lorenzo
Axudas "inmediatas"
O presidente do Goberno Pedro Sánchez e o presidente da Xunta Alfonso Rueda acudiron a Valdeorras nunha visita de recoñecemento dos labores de extinción. Alí, Sánchez sinalou que quedan por diante "días difíciles para Galicia e o resto de España".
Rueda trasladou que no vindeiro consello da Xunta aprobarán axudas para as persoas afectadas polos incendios, moitas delas perderon o seu fogar.
