Os maiores de 70 anos reciben a terceira dose da vacina na Cidade da Cultura

Os maiores de 70 anos son un dos grupos de risco. Pasaron xa máis de seis meses desde que recibiran a segunda dose da vacina contra o coronavirus e este sábado regresan á Cidade da Cultura para que se lles administre unha terceira picada de reforzo.

Están citadas este sábado no Gaiás unhas 3.400 persoas de 70 a 79 anos. Tamén poden acudir determinados colectivos, coma os mariñeiros, sen cita.

Os cidadáns convocados aseguran que van convencidos da eficacia da vacina e da necesidade de poñer a terceira dose. Os sanitarios tamén regresan á Cidade da Cultura e aseguran facelo coas ganas e a ilusión intactas.

Este sábado teñen habilitados no Gaiás 12 postos de vacinación, a metade que nos momentos máis decisivos da inmunización.