Os patinetes eléctricos terán que ter unha matrícula e figurar nun rexistro

Os patinetes eléctricos e o resto de vehículos de mobilidade persoal deberán estar matriculados e incluiranse nun rexistro para poder identificalos correctamente e determinar mellor a súa posible responsabilidade nun accidente de circulación con danos a terceiros.

Este é un dos aspectos que incluirá o proxecto de lei de Seguros de Automóbiles, que foi aprobado este martes polo Consello de Ministros, un texto que mellora as indemnizacións ás vítimas de accidentes de tráfico e obriga a contar cun seguro de responsabilidade civil aos vehículos agrícolas e industriais, así como aos de mobilidade persoal, como os patinetes eléctricos.

O proxecto de Lei remitirase ao Congreso dos Deputados para a súa tramitación parlamentaria, e espérase que a norma poida estar en vigor como moi tarde o 2 de xaneiro de 2026, explican desde o Ministerio de Economía.

Unha vez aprobada a Lei, abrirase un prazo de seis meses para que os titulares destes vehículos de mobilidade persoal contraten o seguro obrigatorio, un período durante o que non poderán ser sancionados por non telo.

As primas dos novos seguros para estes vehículos serían inferiores ás dos vehículos de motor, porque "evidentemente os danos que pode producir un patinete son menores, o risco é menor e a prima debe ser inferior", explica o Ministerio.

A norma mellora a cobertura, indemnizacións e seguridade das vítimas de accidentes causados por vehículos de motor ao establecer unha definición "máis clara e ampla" dos vehículos que deben dispoñer do seguro obrigatorio de responsabilidade civil, entre os que non figuran as bicicletas eléctricas.

Así mesmo, mellora o sistema de valoración das indemnizacións por danos persoais; dá maior seguridade ás vítimas de accidentes en caso de insolvencia por parte das entidades aseguradoras e mellora o control que fan as autoridades da existencia de seguro.

En canto aos gastos de rehabilitación, para as vítimas de accidentes, a nova norma aumentará as horas de axuda, de 16 horas a 24 horas para determinados lesionados graves, e ampliará de 6 a 12 meses o dereito das familias de falecidos ou grandes lesionados a recibir tratamento psicolóxico, entre outras melloras.

A norma busca fomentar o transporte sostible dada a proliferación destes vehículos de mobilidade lixeira, así como mellorar a concienciación social do dano que poden producir e a protección á sociedade polos posibles danos que se poidan producir, explica o ministerio.