Os Reis Magos visitan os nenos ingresados no hospital Teresa Herrera da Coruña

Viaxaron acompañados pola chuvia e o vento. Chegaron cansos, pero felices e cargados de agasallos. Para os Reis Magos, o hospital Teresa Herrera é parada obrigada na Coruña porque saben que os nenos que están ingresados agardan con ilusión a súa visita.

Recibiunos co seu mellor repertorio de panxoliñas o coro de voces da Agrupación Albéniz. A música seguiunos no seu percorrido pola planta de pediatría. A primeira visita foi para Adrián, un neno de seis anos que rachou o cóbado o venres e tivo que pasar polo quirófano. 

A visita real sempre é motivo de ledicia e ilusión para os cativos ingresados, pero tamén para as familias e para o persoal sanitario. Pouco a pouco, os carriños repletos de regalos foron baleirándose.

Os Reis poderán descansar un par de horas, antes de subir ás carrozas da cabalgata que percorrerá A Coruña desde as seis da tarde. Despois, toca deitarse cedo e soñar.