A Asociación de Usuarios de Vehículos Eléctricos bota en falta unha aposta global

O ano pasado a venda de vehículos electrificados subiu un 23 % en España e a tendencia á alza mantense. Febreiro pechou cun aumento de matriculacións do 6,3 %. Con todo, seguimos á cola de Europa na electrificación do parque automobilístico.

O delegado en Galicia da asociación de usuarios destes vehículos cre que falta unha aposta real.

"O tema é unha aposta global, non unha axuda concreta á compra ou á infraestrutura, senón unha aposta real das administracións e tamén das marcas", puntualiza Julio Páramo.

Julio Páramo subliña, por exemplo, que se está a incumprir a parte lexislativa.

"Os puntos de carga que se teñen que instalar está lexislado pero non se está a cumprir a lexislación", explica.

O delegado en Galicia da Asociación de Usuarios de Vehículos Eléctricos asegura que cunha rede de carga adecuada, a autonomía destes vehículos non sería un problema. Tamén defende que non saen máis caros que os coches de combustión, se se observa o seu custo de uso.

"A comparación non ten ningunha dúbida. Os coches, sobre todo os chineses, son incluso máis baratos que os coches de combustión tradicional", mantén.