Os 'tories' analizan o liderado de Liz Truss entre peticións de cesamento

O influente Comité 1922, que supervisa a elección ao liderado do Partido Conservador británico, reúnese este xoves no medio da crecente polémica que rodea o Goberno de Liz Truss, despois de que dimitise Suella Braverman como ministra de Interior, e o caos durante unha votación parlamentaria.

Truss, que asumiu o cargo o pasado día 6, é centro das críticas de deputados do seu partido pola súa xestión, despois de que o seu controvertido programa económico xerase este mes turbulencias nos mercados e provocase o afundimento da libra.

Segundo puido saber hoxe o xornal The Times, o citado comité, que inclúe os deputados conservadores sen carteira, reunirase este xoves para avaliar a actual crise no Executivo.

Ao parecer, segundo o diario, o presidente do comité, Graham Brady, recibiu xa máis das 54 cartas necesarias de parlamentarios tories para convocar unha votación de censura contra Truss mentres que algúns deputados da formación cren que a xefa do Goberno ten os días contados no poder.

Despois da crise que provocou este mes o programa económico e que forzou a Truss a substituír a Kwasi Kwarteng por Jeremy Hunt á fronte do ministerio de Economía, onte presentou a dimisión Braverman por cometer o "erro" de compartir información confidencial a través do seu teléfono persoal. Braverman foi substituída horas despois polo antigo ministro de Transporte Grant Shapps.

Horas despois, nos corredores do Parlamento vivíronse escenas caóticas, no medio de acusacións de coaccións para evitar unha rebelión entre os deputados conservadores cando se votaba a moratoria sobre a fracturación hidráulica ou fracking.

O Goberno de Truss gañou onte á noite a votación nos Comúns sobre o fracking ao impoñerse por 96 votos (326 fronte a 230), os deputados desestimaron unha emenda proposta pola oposición laborista para impedir que o Goberno volva permitir este mecanismo de extracción de gas no Reino Unido. Aínda que ningún deputado conservador votou en contra do Goberno, 40 ausentáronse da cámara.

O deputado laborista Chris Bryant, na oposición, asegurou aos medios que dous ministros —Jacob Rees-Mogg, titular de Empresas, e Therese Coffey, de Sanidade— apertaron os seus correlixionarios para que non accedesen ao corredor para votar en contra do Goberno.