Os transportistas reclaman máis axudas para paliar o prezo dos combustibles

Desde o sector do transporte a suba dos combustibles leva de novo a xuntanzas dos profesionais para valorar a posibilidade de novos paros. A Plataforma Nacional do Transporte, que parou en marzo, votará mañá esta medida, mentres que a Federación Galega de Transporte de Mercadorías segue considerando que sería un erro volver ao bloqueo. 

A axuda do ministerio dos 20 céntimos por litro do mes de marzo que desconvocou o paro do transporte da primavera xa non serve para facerlles fronte aos prezos dos combustibles, que seguen subindo.

Así o valoran os transportistas, e ante esta situación o colectivo que reúne a Plataforma Nacional do Transporte volve falar dun novo paro se non hai unha lei contra os portes a perdas antes de que acabe este mes.

Mañá votarán esta medida, que non comparte a Federación Galega de Transporte de Mercadorías e está negociando co ministerio un novo plan de axudas, tal e como explica Ramón Alonso, presidente de Fegatramer.

Temos unha serie de puntos que lles estamos volvendo pedir. Unha delas é que sigan eses 20 céntimos ata finais de ano, con outros 20 máis porque, como vostede di, xa está absorbido o prezo coas subas que houbo.

Insisten en analizar a orixe desta suba de prezos na cadea de subministración e os beneficios das petroleiras.

 Esa cadea de subministración que se vixíe por partes das autoridades e que miren se se están pasando nas marxes que están obtendo. Non hai máis que ver os resultados das tres grandes petroleiras: Cepsa, Repsol e BP, que ao parecer multiplicaron por oito ou nove os seus beneficios, polo tanto aí si que hai un problema e hai que actuar.

Pídenlles ademais aos transportistas que non cedan ante os abusos das empresas cargadoras.

Sábese dalgún caso que hai cinco anos que non soben os prezos e que lles están pedindo rebaixa, neste momento co gasóleo ao dobre do prezo. Polo tanto aí tamén hai que actuar.

Con estas medidas, din, poderían traballar nunhas condicións normais.