Pedro Sánchez pide "chamarlles ás cousas polo seu nome" e di que a ETA é unha banda terrorista derrotada pola democracia

O presidente do Goberno pronunciouse por primeira vez desde Bruxelas sobre as polémicas declaracións do candidato de Bildu, que rexeitou referirse a ETA como unha banda terrorista.

Pedro Sánchez pediulle a Pello Otxnadiano chamarlles ás cousas polo seu nome e dixo que a ETA foi, con toda claridade, "unha banda terrorista, derrotada pola democracia española".

A polémica non lle fai ao presidente do Goberno cambiar a súa posición con respecto a Bildu como socio de gobernabilidade en Madrid, algo que lle reprochan desde o PP. Alberto Nuñez Feijóo asegura que os populares sempre se posicionaron do lado das vítimas e intentaron que Bildu non entrase nas institucións.

Estas son as palabras do presidente, Pedro Sánchez: "Hai que chamarlles ás cousas polo seu nome, e a ETA non é unha organización armada, nin o movemento de liberación nacional que dixo Aznar. A ETA foi unha banda terrorista que foi derrotada pola democracia española grazas á unidade de todos os demócratas".

Alberto Núñez Feijóo, o presidente do PP, respondeulle: "A primeira vez que hai un presidente do goberno central grazas aos votos de Bildu é con Pedro Sánchez. Nós sempre fomos claros no rexeitamento a que Bildu estea nas institucións mentres que non sexa un partido que teña claro a diferenza entre os que matan e os que morren".