Pelexa entre adolescentes con armas polo medio nos Mallos

Mutismo total na policía e no centro por tratarse de menores. E silencio tamén entre a veciñanza. Uns porque non viron e outros porque non quixeron ver. 

"Polas seis e cuarto houbo un movemento de policía moi grande, tanto da Local coma da Nacional", sinala un veciño.

A pelexa empezou contra as seis da tarde, minutos despois de que remataran as clases no IES Urbano Lugrís. 

"Vin unha multitude de xente que corrían para este lado e había un grupo de mozos moi grande, que debían ser do instituto, e entre eles había tres ou catro que estaban pelexando", explica outro residente que viu a lea dende a ventá.

Leáronse a golpes xusto diante do centro de saúde, con xente entrando e saíndo e con outros paseando os cans polo parque, nunha zona residencial, normalmente tranquila. 
 

"Foi duro e foi forte porque durou varios minutos, pegados ás ventás do ambulatorio, coa xente expectante, pero, de súpeto, disolveuse", engade o mesmo home.

Segundo o ruxerruxe, foi a propia directora do instituto ao que pertencen algúns dos implicados quen se meteu no medio para frear a lea. Seica viñan picados do centro, onde algúNs alumnos confirman que escoitaron berros e insultos. 

Cando chegou a policía, segundo se comenta, a multitude esfumouse, pero polo menos un deles foi identificado e ao cachealo localizáronlle unha arma branca duns 20 centímetros. Non hai constancia de que chegara a usala ou se pensaba facelo, pero, afortunadamente, a pelexa quedou aí.